Kum 2008 atanga India ram puma kalpui tawh, Green India Mission chu Mizoramah hmang ve turin vawiin khan Chief Minister Pu Lal Thanhawla chuan Art & Culture Auditorium, Beraw Tlangah a hawng.

Chief Minister chuan khawvel sik leh sa danglam chho (climate change) leh boruak lum zual zel (global warming) siam that hna hi khawvel ram tam takin ngaihtuahin India pawhin a ngaipawimawh hle a ni a ti a. Green India Mission hi Mizoramah pawh hmang ve in, global warming hi nasa taka tuar thei kan ni a ti a. Chuvangin a siam that hna, ramngaw siam thar te, nungcha leh chungleng sava te, lui sangha te mumal tak leh tha taka kan humhalh a tul a ni a ti a. Chhuan lokal leh zel tur ten chenna tlak leh nuam an neih theihna turin ramngaw tih chereu leh nungchate dim lohna hi kan bansan a pawimawh tak meuh a ni a ti. Tun ang renga kan kal chuan kan ram zimte hi thlaler ramro ah kan chantir mai ang tih a hlauhawm a, kan thlan kotlangah kan thuchhuan ten anchhia min lawh duh mai ang tih a hlauhawm a ni a ti.

Chief Minister chuan mitin hi Pathianin a thil siamte chunga chanchintha hril tura min koh kan ni a, kan mihring puite lakah kan hril tha viau a, mahse A thil siam dang nungcha te, lui sangha te leh thing leh mau te chungah pawh kan hril a tul a ni a ti. Nungcha leh sava te leh lui sangha tur hmang duh hial khawpa nun rawnna kan lantir hian A siamtu zah lohna leh pawisawina a ni a ti a. Chuvangin a chhelai siam thatu kan nih a tul tak meuh a ni a, a ram leilung fate hian neitu rilru pua tan kan lak thar sauh sauh a pawimawh hle a, khawtlang nun siam thatna kawngah pawh theihtawp kan chhuah a hun hle a ni a ti.

Inkhawm kaihruaitu Pu Lalrinmawia Ralte, Minister of State for E & F in kalkhawmte lawmna thu a sawiah sik leh sa danglamna avang leh global warming avanga khawvelin harsatna a tawh siam thatna kawngah kan zavaiin kan pawimawh a ni tiin, heng thil hi veilo leh ngaituahna seng duh loa ‘kei ber ka awm tawh loh chuan a pawi hlei nem’ ti mai loa a siam hnaah tan nasa taka la tur kan ni a ti a.Nungchate leh ramngaw an lo tam leh theih nan Pathian thil siam te humhalh tlat hi kan tih tur a ni a ti.

Pu Lalram Thanga, PCCF & Principal Secretary to Chief Minister pawhin powerpoint hmang chungin thuhma sawina hun a nei a. Hmasawnna hna hi a daih rei thei zawnga kalpui tul a tihthu a sawi a. Climate change leh global warming hian agriculture lam a nghawng nasatzia sawiin, boruak chhia hi lo hal meikhu in a tih punlunzia te a sawi a, tunah rih chuan Mizoram chu ka la vannei a ni a ti.

Green India Mission hi National Action Plan on Climate Change hnuaia mission 8 zinga pakhat a ni a. Ramngaw hectare maktaduai 5 a zau siam tumna a ni a.He scheme hmanna senso tur hi hmarchhak bial tan central sorkarin 90 % a tum anga abak chu state sorkar tum tur a ni. 12th Plan chhung atana hman tur Cheng vaibelchhe 13,000/- dah a niin, kum 10 chhung lo awm tur atan Cheng vaibelchhe 46,000/- ruahman a ni bawk a ni.