1212/2023-2024

Dated Aizawl, the 21st July, 2023: Vawiin khan Chief Minister Pu Zoramthanga chuan Government Hrangbana College Golden Hall ah Hrangbana College zirlai tharte lawmna leh zirlai tithate chawimawina (Freshers' Social & Felicitation) hun an buatsaih chu khuallian niin a hmanpui.

College Annual Magazine 2022-23, "Herhse" a tlangzarh zawhah thusawiin Chief Minister chuan, Hrangbana College chu College langsar leh chhuanawm tak, zirlaite tana luh chakawm tak a ni a, chutiang college tha tak maiin zirlai tharte lawmna inkhawm leh zirlai tithate chawimawina hun duhawm tak an buatsaih hi a lawmawm hle a ni. Zirlai lut thar turte ka lawmpui che u a, a zirchhuak hlimte pawh in kal zelna turah duhsakna ka hlan che u a ni. Alumni Association te mi thahnemngai ten College an la ngaituahzui reng leh zirlai chawimawi tlakte chawimawina an la hlan zel te hi a ropuiin a lawmawm em em a ni, a ti. Pu Zoramthanga chuan, vawiina zirlai naupang duhawm tak takte hian kan nun bul kan tan mek chauhva hmabak thui tak kan la nei a. Kan hma lamah hian malsawmna dawn theihna leh anchhia dawn theihna kawng a awm ve ve a, zu leh ruihhlo laka kan fihlim lo a nih ngat chuan anchhia; mimal, chhungkua leh khawtlang tana pawi leh thalo em em kawngah kan lut dawn tihna a ni. Chuvang chuan kawng dik leh tha, malsawmna kawng in zawh theih nan zu leh ruihhlo lam chi thil tha lo tinrengte hnehtu thalaite lo ni tlat ang che u, tiin a chah a. Duhthlanna dik leh chu duhthlanna hlen tura tumruhna neih tlat hi hnehtu nihna a ni. Miin ral sang tam tak a hneh tawh a ni thei e, nimahsela mahni inhnehtute hi hnehtu dik tak zawk an ni a, tumruhna hmangin chutiang hnehtu dik chu kan ni thei vek a ni, tiin tumruh taka nunkawng thianghlim zawh tur leh an hmaa zirtur awm apiangte hmachhawn turin a chah a ni. Chief Minister chuan, kan hriat theuh angin Covid hripui kan tuara, vawk pul hri kan tuar bawk a, kan thenawm ram chhim leh hmar, chhak leh thlangah kan unauten harsatna hrehawm tak an tawk mek bawk a, harsatna chi hrang hrangin min chim nasa hle. Kan chhehvela harsatna tuar kan unauten Mizoram hi kan inpui, kan tana hmun ralmuang a ni e tiin an rawn pan khawm mur mur a, sawrkar, tlawmngaipawl leh mipuiten a theih ang angin kan buaipui theuh a nih hi. Heng thilte hi Pathianin engemaw ruahmanna tha tak nei chungin kan hnenah a lo thlentir a ni ang tih ring chungin ram leh hnam hmangaihna rilru, hnam thinlung hi i pu deuh deuh ang u, he ram leh hnam hi malsawma tundina, a rawngbawltu atana tihngheh a tum avangin hun harsa tam takah mak takin min lo chhanchhuak tawh thin a, vawiin thleng hian min hruai zel a, tuna kan harsatna hmachhawn mekah te pawh hian min chhanchhuak leh ang tih i vawng reng ang u, tiin kalkhawmte a chah a ni.

He inkhawmah hian Dr. H. Lalzidinga, Principal, Government Hrangbana College pawhin thusawiin, kuminah zirlai naupang thar 560 an neih thu a tarlang a; tam ber hi Mizoram chhung atanga kal an ni a, Tripura state atangin zirlai pahnih, Assam atangin zirlai pathum leh Manipur atangin pasarih te an lut thar bawk. Principal hian zirtirtu kan indaih lohna phuhruk turin nimin mai khan sawrkar chuan zirtirtu paruk min rawn pek belh a, kan lawm tak zet a ni, tiin lawmthu a sawi a ni. He hunah hian tun hnaia University Exama titha zirlaite hnenah lawmpuina chi hrang hrang hlan an ni a. R. Zatlaia Award, Hrangbana College zirlai naupang; University Exam-a a pumpuia titha ber lawmman chu Lalhriatpuia Ralte, Department of Commerce hnenah hlan niin, ani hian Commerce Department ah CGPA 9.17 a score a ni. Hrangbana Awards, University Rank Holders (top ten tling chin) zirlai naupang 22 te hnenah hlan niin, Dr. Suprakash Maiti Award chu Lalremsiami, Department of Commerce hnenah hlan a ni a, Merit Awards zirlai naupang 10 te hnena hlan an nih bakah Department Awards chu naupang End Semester Exam-a 'O' level hmu chinte hnenah hlan an ni a, Alumni Awards chu Subject Topper pahnihte hnenah Alumni Association ten an hlan bawk.