1708/2023-2024

Dated Aizawl, the 31st August, 2023: Tukin zingkar khan Chief Minister Pu Zoramthanga chuan Laipuitlang leh Ramhlun vengte tlawhin khawtlang hruaituten an veng mamawh hmasawnna tur sawrkara an dil hmunhmate a en.

Chief Minister hian Laipuitlang tlawh hmasain Laipuitlang Local Council-in Recreation Centre (Mini Sports Complex) sak an dilna hmunhmate an en hova; khawtlangin Sports Centre an mamawh dante pawh hruaituten an lo thlen a ni. Laipuitlang Recreation Centre sakna tur a ennaah hian Pu Ramthanmawia, MLA, Vice Chairman, Bamboo Link Road Board chuan Chief Minister hi a lo tawiawm a ni.

Hemi hnu hian Chief Minister hian Ramhlun Venglai khawtlangin Ramhlun Venglai Hall sakna atan an dil hmunhmate a en leh a; Ramhlun Venglai Local Council leh khawtlang hruaitu dangten lo dawngsawngin Hall an mamawhna te, a hmunhma an thlan dante an lo thlen a ni. Ramhlun North khawtlang hruaituten Taitea Step an tih mai lirthei kal theiha siam an dil hmunhma a en leh hnuah Ramhlun Vengthar Primary School hmunhma, building lian zawk saa khawtlang mamawh hmunhma hrang hrang dah belh theih tura siam that an dil hmun a en leh a ni.

Hemi hnu hian Chief Minister hian Ramhlun North thlanmual hlui kaltlanga Local Council Road leh Sihpui Road inkar kawng laih an dilna hmun a en leh a, Ramhlun Vengthar khawtlang hruaituten an veng chhung hmun awl, vantlang hmun pawimawh atana din an rawtna hmun leh Vengthar H/S panna kawngpui mumal zawk, vengchhung inkalpawhna kawng pawimawh tak ni bawk sial belh an dilna hmunhma te, Ramhlun Sports Complex vengin Community Hall sak an dilna hmunhmate a enpui leh a ni.