1709/2023-2024

Vawiin khan Mizo Academy of Letters (MAL) chuan hla phuah thiam, V. Thangzama Kutchhuak Zir Chianna seminar an buatsaih a, hetah hian mithiam 14 te thuziak zir ho a ni.

He seminar-ah hian khual lian Dr. L. Thangmawia, MLA, Vice Chairman, Human Resource Development Board chuan, V.Thangzama hlate chu zir chian tlak tak a ni a, a hlate hi kawng hrang hranga thlir pawha Mizo hnam tana hlu tak vek a ni a. A hlate han zir chian hian V. Thangzama hi ram leh hnam hmangaihtu (Nationalist) ropui tak a ni tih a hriat theih a, a hlate hian Zofate a phuarkhawm a, ṭhangthar zelte tan pawh a hlate hi zir zel tlak a ni, a ti bawk.

Seminar hi Prof. R.L Thanmawia, MAL President chuan a kaihruai a, Pu Lalrammawia Ngente, Asso. Professor, Govt. Johnson College chuan thupui sawihawnna a nei a. Seminar hi hun thumah ṭhen niin mithiam 14 ten paper an buatsaih chu zirho a ni.