May ni 11, 2013 a Laipuitlang leimin vanga tuarte tanpuina tur Central YMA ina a dawn tlingkhawm Rs.97,43,022/- chu vawiin khan CYMA office, Aizawl Tuikhuahtlangah semna inkhawm CYMA in a buatsaih a, Chief Minister Pu Lal Thanhawla chuan a hmanpui.

Chief Minister chuan leimin tuarte vanga CYMA in tanpuina sum hlanna inkhawm a buatsaih chu a lawmawm hle a, mahse tawrhna avanga buatsaih ani chu a lungchhiatthlak hle a ni, a ti a.YMA te hnathawh hi a ropui a, India sorkar pawhin a hriatpui tawh a ni, a ti. Mizo ten chhiat tawkte kan tawrhpuina kan lantir dan hi a ropui a, Mizo nih leh ringtu nih hi a inhmehin a nuam hle a ni, a ti a. Mizoram hi lirnghing na tak awm theihna hmun leh kan leilungte hi a naupan avangin leimin thei tamna hmun anih avngin in sak thuah kan fimkhur hle a tul a ni, a ti a. Aizawl bik hi geological mapping tih tawh anih thu sawilangin Chief Minister chuan hmun himlo laite chhinchhiah a ni a. Mahse Mizo ten hetiang lam hi kan ngaihven lemlo a, kan remchan dan angin in te ka sa mai zel a. Sorkar chuan ram pek thuahte kan fimkhur hle a tul tih a hria a ni, a ti. Laipuitlang chhiatna rapthlak tak hi tun hun zelah fimkhur nan hmang thei ila a duhawm hle a ni, a ti. Lusun chhungte leh chhiat tuartu zawng zawngte kan tawrhpui tak zet a, Pathianin thlamuana awmpui turin kan tawngtai sak reng a ni, a ti.

Bialtu Mla Pu H,.Liansailova, Finance Minister chuan Laipuitlang leimin tuartute chu an tawrhpui tak zet thu sawiin,chhanchhuah hna thawk zawng zawngte chungah lawmthu a sawi a, CYMA in tawrhpuina lantir nana tanpuina an khawm chu fakawm a tih thu sawiin, a hlanna hun an siam chu lawmthu a sawi a. Hetiang hun hi hman ngailo se tih chu duhthusam a ni tiin, chhiatna kan ngaihtuah letin a hreawm hle thin a ni, a ti.

Tanpuina sem inkhawm hi CYMA President Pu T.Sangkunga’n a kaihruai a ni.

Tanpuina sum thawhkhawm zawng zawng hi Rs.97,43,022/- a ni a. Heta tang hian Mitthi te tan 68.8%, Rs.68,00,000/- sem a ni a, Hliam te tan 2%, Rs.1,94,000/-, In chhe vek-16.95%, Rs.16,51,822/-, In chhe nelnual- 0.3%, Rs.30,000/- leh Bungraw chan te tan 10.95%, Rs.10,67,200/- sem a ni a. Mitthi te tan hian Rs.4,00,000/- theuha hlan an ni a, Hliam na tak tuar tan Rs.1,00,000/- leh hliam na vaklo Rs.5,000/- zela sem a ni bawk a,In chhe vek neitute hnenah (RCC)Rs.2,63,000/- leh Assam Type Rs.20,000/- theuhte, In chhe nelnual Rs.10,000/- theuh leh Bungraw chan vek te tan Rs.52,540/- theuh a hlan an ni. Tanpuina semah hian motor a huam tello a ni.