Nimin kha Gauhati High Court hnuaia Aizawl Bench din champhaphak vawi 23-na a ni a, he ni lawmna programme Aijal Club-a nimin tlaia Gauhati High Court, Aizawl Bench-in a buatsaih chu Law & Judicial Department enkawltu Minister Pu Lalsawta’n a hmanpui. Foundation Day lawmna programme-ah hian Gauhati High Court Judge pahnih - Pu Justice Ujjal Bhuyan, Portfolio Judge for Mizoram leh Pu Justice L.S. Jamir, Station Judge te; Pu R. Lalrinawmna, Chairman, Mizoram State Law Commission; Mizoram Judicial Service officer te leh Mizoram Bar Association member thahnem tak bakah Aizawl Law College Principal leh Faculty te pawh an tel a ni.
Pu Lalsawta chuan roreltu leh rorelna chungchang Judiciary chu mipui thlan sawrkar Democracy hnuaia banpui pathum te zingah pakhat a nih thu sawiin Judiciary hnuaia hnathawkte chu tlemte nimahse an hnathawh chu a ropui a, a bikin takin Aizawl Bench chuan Mizoram leh khawtlang tan hna an thawk nasa a ni a ti. Aizawl Bench a awm atangin thalai tam tak ten law lam te zirin ukil hna an thawk a, tam tak chu Mizoram Judicial Service ah te an lut a, he hi Aizawl Bench din rah vek a ni a ti bawk.
He hun hman puitu High Court Judge pahnihte pawhin programme-ah hian thu an sawi. Pu Justice L.S. Jamir chuan 2008-a Mizoram-in Separation of Judiciary a kalpui chu Ram Danpui a taka hlenchhuahna ropui tak nia a hriat thu a sawi. Pu Justice Ujjal Bhuyan chuan Mizorama thubuai ziahluh a tlem thusawiin hei hi Mizo mipui ten midang khin buai an duh loh avang te, khawltang in inremna tha tak an siam thin avangte leh tlawmngai pawl chak tak hnathawh avangte nia a rin thu a sawi bawk.
Foundation Day lawmna programme-ah hian Pu R. Thanga, Registrar, Gauhati High Court, Aizawl Bench chuan inlawmna thuchah sawiin Aizawl Bench lo din chhoh dan te leh kum 23 chhunga Aizawl Bench hnathawh te a tarlang. Pu L.H. Lianhrima, President, Mizoram Bar Association pawhin thusawiin Aizawl Bench chuan hna an thawk tha a mahse duh thawh a lo tlin lo nia a hriat thu a sawi. Pu G. Pradhan, Joint Registrar, Gauhati High Court, Aizawl Bench chuan lawmthu sawiin Foundation Day lawmna programme hi a khar a ni.
Foundation Day lawmna programme zawh hian a hmun pangngaiah Mizoram Judicial officer te tan Workshop buatsaih lehnghal a ni a. Workshop thupuia ‘Impact of Judicial Separation on the Society and the Role of Judicial Officers in Mizoram’ tih hman a ni.
Pi Marli Vankung, President, Mizoram Judicial Service Association chuan Workshop neih chhan te sawiin, Worshop-in a tum tlangpui te a tarlang. Thupui chungchang sawi hawnna chu Pu Justice Ujjal Bhuyan an nei a, Pu S.S. Dey, Advocate, Gauhati High Court, Guwahati chuan Workshop thupui chungchangah presentation neiin sawizauna hun a hmang a, hemi hnu hian kalkhawmte chuan thupui chungchangah zawhna leh chhanna hun an hmang zui nghal a ni.
