2177/2023-2024

Dated Aizawl, the 5th October, 2023: Vawiin khan Mizoram Government Adhoc Aided School Teachers Union (MIGASTU) ten tun hnaia Council of Ministers in an member school 180 te sawrkar school atana a hlan kai sak (provincialised) lawmna inkhawmpui lian Chanmari YMA Hall ah an buatsaih a, Pu Zoramthanga, Chief Minister chuan khuallian niin a hmanpui a, Pu Lalchhandama Ralte, Minister, School Education Department chu khualzahawm a ni.

Thusawiin Chief Minister chuan, ramin hma a sawn theih nan thil pawimawh tam tak awm mah se zirna leh hriselna te hi nitina kan mamawh mitin nghawng an ni a. Sum leh pai harsatna karah sawrkar chuan anni pahnih tan hian theihtawp a chhuah reng thin. Nangni pawh hi kan hrereng che u a, hripui leh harsatna dangten min tlak buak nasat avangin kan beisei anga chakin kan ngaihtuahzui thei lo mai zawk a ni. Tunah hei Education Minister leh Department thawktuten ruahmanna tha tak an han siam a, kan zawh tawk tur ngaihtuah chungin he hmalakna hi kan tihlawhtling thei ta a, kan lawm hle. Sum leh pai tam tak a mamawh tel avangin mi thenkhatin a taka kan kalpui theih an ring lo mai thei. Amaherawh chu Pathian leh mipuite zarah sawrkarna kan chelh leh a nih chuan tha taka kan kalpui theih kan inring a, sawrkarin sum leh pai hnar tha zawk a neih theih nan Resource Mobilization Department kan siam thar a, chungte chu tangkai takin kan hmang dawn a ni. Mizoram hian harsatna te tawk thin mah ila Pathian hruaina duhawm tak kan chang thin a, tunhnaia harsatna kan tawhteah pawh a kaihruaina duhawm tak kan chang nasa hle. Pathian hian kawng lakah min kalsan lovang tih leh; min la hruai zel ang tih hi ka ring tlat a ni, a ti. Sawrkarin zirna a ngaihpawimawh avangin heng thil hi a ti tih hria a, an thawhna hmun theuhva theihtawp lo chhuah turin a chah a ni.

Khualzahawm Pu Lalchhandama Ralte pawhin thusawiin, sawrkar school a hlan kai thar zawng zawngte a lawmpui thu hrilhin "In lawmna zatin kan lawm ve a ni", a ti. Adhoc Aided a hlan in nih chhoh lai khan tha thawhtute zingah ka lo tel ve tawh a, kuminah sawrkara in luh theih nana tha thawhtute zingah ka tel ve leh te hi vannei ka inti hle. He dinhmun thleng tur hian Rules hautak leh kawng thui em em siam hmasak a ngai a. Chu Rules chu September ni 24 khan peih fel a ni a, a hnu ni thumah September ni 27 khan Council of Ministers chuan a pass zui ta a ni. A tuk ni 28 ah Ministry of Education dawrin Delhi ka kal nghal a, Government Facilities in dawn theihna tur ka zu sawi fel a. Tin, ni 29 khan sawrkar school a dah in nihna Notification kan tihchhuak nghal bawk. Kan ram hian a tha zawngin chak takin ke a pen mek a, sum leh pai harsatna karah pawh hmasawn tura hmalak kan thulh chuang lo a ni. Vawiina in duhthusam dinhmuna kan hlankai che u chhan chu sawrkarin zirna a ngaih pawimawh vang a ni. In thawhna hmun theuhva zirna tha tak pe a, a huna school kal a, dar bi kima hnathawka, zahawm taka invawng turin kan beisei che u a, kan thlir zui tlat dawn che u a ni, tiin a chah a ni.

Pu Lalsangliana, Director, School Education pawhin thusawiin, vawiina provincialised hmu school 180 te kaltlang hian chawp leh chilhin chhungkaw 1422 ten hlawkna an tel nghal a, school dang dinhmun tha zawka hlankai zawng zawng te nena belhkhawm phei chuan chhungkaw 2748 ten hlawkna an tel nghal a ni. Hetiang taka sawrkarin a ngaihtuaha, dinhmun tha taka a dah cheu chhan chu Mizoramin zirna tha a neih zel theih nan a ni, a ti a ni.

Sawrkar sikula hlankai lawmna inkhawm hi Pu Lalmuanchhunga, Vice Chairman, MIGASTU in a kaihruai a, Pu J. Lalvarlien Puruolte in hunserh hmangin, kal khawmten urhsun takin "Ro min rel sak ang che" tih hla an sa a. Pu Lalzirliana, Chairman, MIGASTU pawhin thusawiin, he thil ropui tak hian kan rama zirlai rethei tak takte leh hausa zawkte inkar a tizim dawn a, thingtlang khaw tam takten kan duhaisam sawrkar school an nei thar a, zirlai leh zirtirtu tam takten kan chhawr tangkaiin Mizoram hian a rah hlu tak kan tel dawn a ni, a ti. He hunah hian Mizoram Teachers Federation aiawh leh Mizoram Government Adhoc Aided Higher Secondary School Lecturer Association aiawh te pawhin thusawina hun a hmang bawk.

He hunah hian Khuallian leh khualzahawm hnena thilpek hlanna te leh an member boralte sunna hunte an buatsaih a ni.