2176/2023-2024

2023 Khuangchawi thla ni 5: Vawiin khan Kolasib Diakkawn YMA Hall-ah ‘Nungcha humhalhna kawnga thawh hona’ (partnerships for wildlife conservation) tih thupui hmangin 69th National Wildlife Week (Nungcha Humhalh Hapta) hman a ni a. Kolasib District Bawrhsap Pu John LT Sanga chu Khuallian niin, Principal Secretary & Principal Chief Conservator of Forests (Retired) Pu Lalram Thanga chu Khual Zahawm a ni.

Khuallian Pu John LT Sanga chuan, India ram leh Mizoramah 69th National Wildlife Week hman theih a ni chu lawmawm a tih thu sawiin, tun kar (October 2 - 8, 2023) chhung hi a pawimawh hle a, ‘Faina Hapta’-ah faina kan inzirtir mek laia nungchate humhalh kawnga inzirtirna hun, National Wildlife Week kan hmang leh thei hi thil chhinchhiah tlak tak a ni, a ti a. Thing leh mau, nungcha tinrengte duat taka enkawl chu Pathianin mihringte mawhphurhnaa a dah a ni a, mihringte'n kan nawm kan maka nungchate kan tihnat a thiang lo tiin, boruak ṭha min petu thing leh mau, leh nungchate hi mihringte tel lova an awm theih laiin mihringte zawk hi an tel lovin kan awm thei lo thung a, an chereu mai loh nana ven him chu keimahni leh kan thlah lo awm turte tan kan bat leh kan tih makmawh a ni, a ti a. Nungcha leh thil siamte chunga nunrawng chuan malsawmna an dawng ngai lo ang tiin, ramsate, nungchate leh thing leh mau hlutna zir chhuak zel turin kal khawmte chu a chah a ni.

Khual zahawm Pu Lalram Thanga chuan Mizoram hian ramngaw (forest)-ah hausakna inphum ru (potential) tam tak a nei a, a hlutna hriat leh humhalh kawngah pawh tun hma ai chuan nasa takin hma kan sawn a ni, a ti a. Nungcha humhalh kawngah sawrkar leh a kaihhnawih pawl bil te'n theih tawp chhuahin hma la mah se, ramvaka sa pel duh tawk an la awm chhung chuan hma lakna a sawt mawhin, nungchate'n chereu lam an pan deuh deuh zel a ni tiin, ramngaw leh nungcha humhalh hi forest department tih tur chauh a ni lo va, khua leh tui ṭha chuan kan zavaia kan tih tur a ni, a ti a. Nungcha humhalh chu thawh hona ṭha aṭang chauhva hlawhtling thei a ni tiin, zirlaite, tlawmngai pawl hrang hrangte leh mimal tin chu nungcha humhalh kawngah sawrkar leh hma latu dangte nen theih tawpa thawk ho zel turin a sawm a ni.

He hun hi Kolasib Divisional Forest Officer Pi Margaret Lalramchhani chuan kaihruaiin, Pastor H. Zaṭhuama'n hunserh a hmang a. Conservator of Forests (Northern Circle) Pu Lalnunzira chuan keynote address sawiin, Vairengte Range Officer Pu Marcellas Hunlawmawma chuan ‘Wildlife Protection Act (Amendment) 2022’ chungchang presentation a pe a. Assistant Conservator of Forests (Retired) Pu Rongura Hrahsel chuan ‘Conservation of Bio-diversity’ tih thupui hmangin presentation a pe bawk a. Central Forest Range-a Range Officer Pi Laltleipuii chuan zirlaite tan ‘On the Spot Quiz’ a buatsaih a. Kolasib Sub-Headquarters MHIP President Pi C. Laldinpuii pawhin thu sawiin, Kolasib District Honorary Wildlife Warden Pu Christopher JZ Lawlor chuan tun hnaia an lehkhabu tihchhuah, "Waterbirds of Kolasib" kam keuna hun a hmang a. School of Nursing, Thingdawl zirlaite aṭangin zaipawl zai leh Nl. Grace Lalchhanhimi hnen aṭangin malzai ngaihthlak a ni a. Assistant Conservator of Forests Pu Thanliana Hauhnar chuan lawm thu sawiin hun a khar a ni.

He hunah hian sawrkar official-te, Govt Kolasib College, Govt C. Zakhuma Higher Secondary School leh St John's Higher Secondary School zirlai naupangte, tlawmngai pawl ai awhte leh chanchinbu mite an tel a ni.

National Wildlife Week, 2023 hi October ni 2 aṭanga October ni 8 inkar chhunga hman tur a ni a. India Hnam Pa Mahatma Gandhi pian champha phak pualin India ram pumah kum tin hman ṭhin a ni.