2175/2023-2024

Aizawl the 5th October, 2023: Vawiin khan Er. Lalrinawma, Social Welfare, Tribal Affairs, Women & Child Development Department Minister chuan Kelsih-ah Tribal Research Institute (TRI), Ministry of Tribal Affairs, Government of India hnuaia sak chu khuallian niin a hawng.

Khuallian chuan khawvel changkanna kal zelah kan hnam nunphung leh ziarang te zawi zawiin thildangin a rawn thlak mek a. Research Institute chu kan hnam chin dan, kan culture leh traditions vawnnun zel nan leh inzirna hmun ni turin a tangkai hle dawn a, hnam tenau zawk chimral kan nih loh nan hnam tan Asset ropui tak a nih a beisei thu a sawi. Kan hnam ziarangte hi Pathianin keimahni mil tawk min pek a nih tih hi pawm thiam turin leh zahpui lo turin kalkhawmte chu a chah a. Mizote hian kan hnam kan ngaihsan a hun takzet tiin hnam tha, hnam huaisen, rinawm leh taima hnam kan ni tih chu kan rilru-ah nghet taka pawm turin thalaite chu a chah bawk.

Chutianga keimahni leh keimahni chapo lova kan hnam ziarangte kan chawisan tlat chuan kan hnathawhah te a lang chhuak anga, hnam tan thawktu tha ber kan ni vek thei a ni a ti bawk.

Tribal Research Institute Estimate Amount hi 2028.50 Lakhs niin 2019 March atanga sak tan a ni a. FK Construction sak niin nikum December khan sak zawh a ni. A ram zau zawng Area hi 4.38 hectare niin Building Structure 13 a awm a. Zawlbuk, Exhibition Library leh Auditorium, Mizo Lal In (Administrative Building), Conference Hall-te a awm a ni. Mi 50 ve ve lenna mipa leh hmeichhe Dormitory awmin VIP Cottage 4 a awm a bawk a. Workshop cum Training Centre a awm bawk dawn a. Ladeh, Hnanghlai, Puantah leh hnam thil inzirna hmunpui a ni dawn a, Staff Quarters unit awm bawkin ruahtui khawlkhawmna Tanky tui litre nuai 2 leng siam a ni a. Synthetic thatch (Artificial di) kangmei laka him, USA atanga chah luh hmangin a chung hi khuh vek a ni a, a chhuat leh a building bangte hi mau dap ziarang customised glaze tile leh wall paper bel vek a ni.

He hunah hian Mizo lemziak, Mizoram Indigenous Association-te atangin infiamna bakah themthiamna chi hrang hrang entirna hun neih nghal a ni a. Special Invitee Department Director hluite hnen atangin thusawi ngaihthlak a ni bawk.

TRI hi kan hnam ziarang, kan culture leh traditions vawnnun zel nan leh kan hnam chin dan hrang hrang, themthiamna inzirtirna hmunpui a ni dawn a, thiam hnang leh La deh zir bing duh tan mimal leh pawl anga zir theihna tura buatsaih a ni.

TRI hawnna hun hi Director, SW, TA&WCD chuan kaihruaiin C. Zodinpuii, Jt. Director, SW, TA&WCD chuan khuhhawnna a nei a. Pu Lalthankima, Asst. Engineer, SW, TA&WCD chuan lawmthu a sawi bawk a ni.