2174/2023-2024

Aizawl, the 5th October 2023 : Deputy Chief Minister Pu Tawnluia, Urban Development & Poverty Alleviation Department changtu ni bawk chuan vawiin khan MINECO Junction ah Aizawl Smart City Limited (ASCL) hmalaknaa MINECO Multi Level Parking bulah hmun ruak a, mipui vangtlang tana tual lenna tur project ‘Construction of Urban Landscape & Avenue Plantation’ tih chu a lungphum a phum a. He hmunah vek hian Deputy Chief Minister in ASCL hmalakna thoa, Ambulance changkang chi 5G/Smart Ambulance leh khawpui huam chhunga YMA Branch te hnenah kangmei a chhuah palh a a ti mitna tur hmanrua ‘Portable Fire Fighting Pump with Ancillary Equipment’ hlanna te a nei bawk a ni.

He project lungphumna leh heng bungrua hlanna puala programme, MRB Conference Hall, MINECO ah neiha thusawiin Pu Tawnluia chuan Aizawl Smart City Limited hnuaia hmalakna hrang hrang te tarlangin, heng hmalakna leh ruahmanna kaltlanga Aizawl khawpui hmel thar lang mek chu lawmawm a tih thu a sawi. Heng zinga project tam tak entir nana khawpui chhunga infiamna hmun hma thar hmun tam taka siam leh buatsaih mek te bakah tunhnaia khawpui chhunga college te tana smart classroom ruahman te chu thalai te pual a nih dan a tarlangin, smart city project tam tak hian thalai te a tinzawn a ti. YMA Branch tin te hnenah pek tur kangthelhna hmanrua pek tura ruahman chu lawmawm a tih thu sawiin YMA te hi chhiatrupna a thlen palha a che hmasa bertu an ni a, chhiata thlenin Sawrkar kut ke pawimawh tak a ni a, he kangthelhna hmanrua hi kangmei lo chhuah palh a rang taka chet lakna kawngah nasa takin a pui thei dawn a ni, a ti. ASCL hmalakna tho in Fire & Emergency Services tan kangthelh motor 4 lei turin ruahman mek a nih thu a sawi bawk.

Smart City hnuaia project chu a hun pawhsei niin nakum June ah project te hi zawhfel vek a ngaih chu Deputy Chief Minister chuan sawiin chuvangin heng hna te hi a hun taka kan zawh thei nan a thawktu zawng zawngin theihtawp chhuahin tan in khawh a ngai dawn a, chuvangin tang mar pata hna thawk turin ka chah duh cheu ni, a ti.

Construction of Urban Landscape & Avenue Plantation hi cheng nuai 972 senga MINECO Multi Level Parking leh Open Gym MINECO inkara hmun ruaka sak tura ruahman a ni a. Mipui vantlang tual lenna hmun hring leh nuam ni pahfawma basket ball (half court), open theatre, skate boarding hmun, sky walk leh thil dangte awm tel tura ruahman tum a ni.

5G/Smart Ambulance hi Aizawl Civil Hospital, Zoram Medical College bakah private damdawiin 6 – Ebenezer Hospital, LRM Hospital, Trinity Hospital, Greenwood Hospital, Alpha Hopsital leh BN Hospital te pek tura ruahmanna a ni a, vawiin khan 2 chu Health & Family Welfare Department hnenah hlan a ni a, a dang paruk te chu tun thla chhunga hlan tum a ni. Heng ambulance hi tunlai ambulance changkang a ni a, damlo na tak tak phurh nana tunlai hmanrua leh thiamna tela thuam a ni. Heng ambulance 8 man hi nuai 698 hu a ni.

Khawpui huam chhunga YMA Branch 108 te hnenah kangmei a chhuah palh a a ti mitna tur hmanrua ‘Portable Fire Fighting Pump with Ancillary Equipment hi vawiin khan engemaw zat CYMA hnenah hlan a ni a, adangte pawh a lo thlen in a tahtawlin hlan a ni ang. Heng hmarua leh Fire Tender 4 lei nan cheng nuai 446 sen a ni dawn a ni.

Programme hi Pu Lalmalsawma Pachuau, Planning & Programme Implementation Department Secretary in kaihruaiin heng ruahmanna leh hmanrua te chanchin kimchang leh a pek dan tur chu Pu C C Lalchhuangkima, CEO, ASCL hnen atangin ngaihthlak a ni. Programme ah Hospital & Medical Education leh Fire & Emergency Services Director te leh CYMA President te pawhin thusawina hun an nei a ni.