2173/2023-2024

Khawzawl, 5th October 2023: Vawiin khan Khawzawl DC Conference Hall-ah October ni 5 atanga ni 12 chhunga hman tur Right to Information Week hawnna hun neih a ni a. He hun hi Khawzawl DC Pu K. Lalrohlua chuan khuallian niin a hmanpui.

Khuallian Pu K. Lalrohlua chuan thu sawiin Khawzawl District chhungah Office pariatah chiah RTI online a zawh theih a la ni chu pawi a tih thu a sawi a; RTI Week chhung ngeia RTI Online-a inziak lut vek turin Office zawng zawng te a ngen. Mipuite pawhin a nazawnga RTI hmang mai lova, an thil hriat duh te chu a department changtute zawtchiang hmasa thin turin a chah nghal a. Office hrang hrang a State Public Information Officer leh State Public Assistant Information Officer te chu an mawhphurhna tha taka hlen chhuak thin turin khuallian hian a fuih nghal bawk.

He hunah hian Khawzawl SDO (Sadar) Pu Vabeimozachhi Chozah chuan RTI chungchanga hriattur hrang hrang te sawifiahna hun a hmang a, zawhna leh chhanna hun hlawkthlak tak hman a ni bawk.

Inkhawm hi Pu Lalfakzuala, Khawzawl Addl. DC chuan a kaihruai a, Pu Lalchhuanawma Ralte, DIPRO chuan lawm thu a sawi. Inkhawmah hian Khawzawla Office hrang hrang aiawh te, MJA, NGO leh VC aiawhte bakah Khawzawl HSS zirlai naupangte an tel a ni.