Chief Minister Pu Lal Thanhawla’n tukin khan Assam Rifles Lammualah Mount Carmel Annual Sports vawi 28-na a hawng.

Chief Minister chuan games & sports hi thluak hman nasat ngai a ni a, chuvangin lehkha thiam thei takte chuan sports hi an thei tur a ni a, sports thei viau te chu lehkha pawh an thiam thei tur a ni a ti a. Mount Carmel School chu exama ti tha thin, result pawh tha tak nei thin a ni tiin, zirlai naupangten an thiam thil an entirna ah leh an chevelah Zoramin kan mamawh em em mahni inthununna te, zirtirtute zah leh an thuawihna te an nei a ni tih a hmuh theih a ni a ti a. Hei hi Principal leh zirtirtute inpekna leh thawhrimna vang a ni a ti. Games & Sports tih vanga zirlai ngaihthah mailo turin school naupangte chu a chah a ni.

Chief Minister chuan tunlaiah zirna sang tak tak nei, mahse chhawr tlak loh leh sorkar hnaa inziak tling zo lo tam tak an awm avangin kan education standard chawikang a, quality education kan neih theihna turin ‘Education Reforms Commission’ sorkarin a din a, rawtna tha tak tak a thehluhte chu sum harsatna avangin duh angin a kal chakpui theilo a ni a ti a, zawi zawiin kan tipuitling chho mek a ni a ti. Thalaite tan zirna tha leh sports lama hmalaknate piah lamah skill leh capacity building lamah te sorkarin hma a lak thu a sawi a. Nakina ram leh kohhran hruaitu tur ni turin nu leh pa te thuawi a,aia upa te leh zirtirtute thuawih bawkin, kan taksa leh hriselna tichhe theitu zuk leh hmuamah fihlim hmasa turin zirlai naupangte chu a chah a ni.

School Principal Lalnunkunga Sailo in zirlai nu leh pa te, sawm bikte leh zirtirtute leh zirlai naupangte lawmna thu a sawi bawkin, abikin Chief Minister Pu Lal Thanhawla’n an sawmna a tihhlawhtlin sak avangin a hnenah lawmthu a sawi bawk.