Ramchhung hmun dang rualin vawiin khan Kolasib ah pawh a vawi khatna atan World Soil Health Day chu Krishi Vigyan Kendra (KVK) Kolasib ah hman a ni a. He hun hi Kolasib DC Pu H. Lalengmawia, IAS chuan khuallian niin a hmanpui a ni.

Pu H. Lalengmawia chuan loneitu leh kuthnathawktu te chuan a thinlung lairial an luah thusawiin an hna thawh a ropui a, ram tana rawngbawltu ropui an ni a ti a. Kolasib District  chu Mizoram hmun dang ngaihtuahin a ram leilung a tha in, a rem a, inkalpawhna te pawh a tha a, chuvangin District chhunga loneitu leh kuthnathawktu te chu hmun dang aiin an vannei zawk nia a hriat thusawiin DC chuan Mizoram District danga loneitu te tan model entawntlak ni turin he huna kuthnathawktu kalkhawmte chu a chah a. Lo neih leh huan siam chu a zau loh chuan tharchhuah a tam lova tiin lo zau zawk an neih theih nan tan la turin a fuih a, thiamna leh hriatna an mamawhnaah KVK a mithiamte chu engtik lai pawha inthlahrung lova rawn turin a chah bawk.  District chuan hmasawn zel a phu in a tum tiin Pu H. Lalengmawia chuan Sawrkar hnathawkte chu an hna hlawh lak nan chauha hmang lova an mahni zawn theuhah engtin nge mipui leh District in hma sawm theih ang tiin an ngaihtuahna leh rilru seng turin  a chah a ni.

He programme hi Pu Lalrosanga Khiangte, Senior Scientist leh Head, KVK, Kolasib chuan a kaihruaia, Pu C. Lalfakawma, Scientist (Plant Protection) chuan lei an test dan chanchin sawiin Soil Health Card chungchanga thil pawimawh hrang hrangte a sawi bawk.

Pu H. Lalengmawia hian Kolasib District chhunga loneitu 10 te hnenah an lei test na result chanchin kimchang tarlanna, KVK in a bautsaih Soil Health Card chu a hlan bawk a ni.

KVK hotute tarlan danin Soil Health Card siamna atan hian District hmun hrang hrang atangin soil sample 250 vel an la a, chu chu an hmunpui pakhat ICAR, Barapani ah an zuk test a. Sample tam zawkah sulphur leh nitrogen a tlem tih hmuhchhuah anih thu leh lei hawng (organic matter) leh micro-nutrients awmzat chu a tha thawkhat nia hmuhchhuah anih thu te an tarlang a. Oil palm leh kuhva chinna hmunah sulphur content hi a san a ngaih thu mithiamte hian an tarlang bawk a. Soil sample an lak zawng zawngah hian Soil Health Card siam vek a ni.