Indian Medical Association (IMA) Mizoram State Branch Annual Conference vawi 39 kharna inkhawm, Tourist Centre Berawtlanga neih chu vawiin khan Mizoram Chief Minister Pu Lal Thanhawla chuan khuallian niin a hmanpui.
Pu Lal Thanhawla chuan doctor hna chu hna zahawm berte zinga mi, khawtlang tana chhen fakawm leh mipuite thlamuanpui tham, natna tidamtu leh enkawltu an nih avangin nun an pawimawh hla a ni, a ti. Mizote hian hriselna kawngah hma bak kan ngah hle a, ei leh inah kan fimkhur loh avang leh zuk leh hmuam kan insumloh avangin natna hlauhawm tak takin min run mek a ni, a ti a. Heng kawngah hian kan thanharh theih nan doctor-te chu Mizo hnam pumpui kaihhruai tur leh zirtir turin a sawm a. Thiamna thang zel leh natna thar lo chhuak zel karah Chief Minister chuan doctor-te chu in zir peih a, in tuaithar reng turin a chah a ni. Natna tam tak pumpelh nan awmze nei zawka bawlhhlawh sawngbawl a tul nia hriain department leh khawtlang hruaitute nena thawkhovin hemi kawngah hian ngaihtuahna thar seng turin doctor-te a sawm a. Pu Lal Thanhawla chuan sawrkarin intodelh turin hma a la a, intodelh tur chuan taimak a tul a, taima tur chuan hrisel a ngai a ni tih sawiin chuta tana pawimawh ber leh mipui kaihhruai theitu chu doctor te an ni, a ti.
IMA hi India ram pum huapa doctor-te insuihkhawmna pawl niin medical science in hma a sawn zelna turin hna a thawk a, mipui zirtirna leh enkawlna kawnga hma latu pawl pawimawh tak a ni. Kumin Conference-ah hian thupui thlan bik atan “Pre-Natal Counselling & Parental Education” tih an hmang a. Naute hriselna leh nu leh pa in nau an pai tirh atanga naupang an enkawl danah zirtirna tha zawk an dawn theihna turin he conference ah hian doctor-te’n intuaitharna hun an hmang nghal a ni.
Pre-conference workshop hi December ni 3, chawhnu lamah Aijal Club-ah tanin mithiam hrang hrangin zirtirna an pe a. Conference chhung hian IMA Academic Wing leh Health Department (NHM) buatsaihin thupui sawina hun hlawk takin an hmang a ni.
Kharna inkhawm hi IMA, Mizoram Branch President Dr R.Lianzama’n a kaihruai a. Hony.Secretary Dr.John Zohmingthanga’n kum khat chhunga an pawl hmalakna hrang hrang a tarlang a. An member boral Dr C.Thanchamliana, Dr. Lalthahluana, Dr. Zaihmingthanga leh Dr.J.Zolawmzuala te sunna hun an hmang a, an pawl Treasurer Dr. Lalhuthangi Hmar chuan lawmthu sawiin hun hnung a khar a ni.
Attachment
- Loading attachment...
