Champhai District-a khaw panga - Dilkawn, Kelkang, Melbuk, Mualkawi leh Zokhawthar te chu Khawzawl RD block atanga Champhai RD block-a sawn an nih lawmna hun vawiina Mualkawi a buatsaih chu Rural Development Minister Pu R. Lalzirliana chuan a hmanpui a. He hunah hian NIB Chairman leh Champhai South bialtu MLA ni bawk Pu JH Rothuama leh Champhai North bialtu MLA, Parliamentary Secretary Pu TT Zothansanga ten an telpui a ni.
Minister chuan khawtlang hmasawnna ngaihtuah tur chuan a chhunga cheng a neitute an pawimawh ber thu sawiin, kan khawtlang nun siamtha a, khawtlang cheina tur leh hmasawnna hna dang chi hrang hrang te thahnemngai taka kalpui tak tak theitu chu a ram neitute kan ni, a ti a. Ramri dep a awm an nih hlawm avangin ram dang mite laka Mizo nun mawi leh entawntlak tak chu phochhuaktu langsar ber an nih thu sawiin Minister Pu R. Lalzirliana chuan nun fimkhur a tul thu a sawi a. Chutihrual chuan ramri lehlama kan hnampui awm te chu ram danga cheng ni mahse kan inunauna hre rengin inhrethiam tawn taka khawsak ho tumna rilru put tlan a duh thu mipui pungkhawm hmaah chuan a sawi a ni.
Bialtu MLA Pu JH Rothuama chuan khawtlang hruaitute leh mipui ten sorkar hotute an dawr a tul chang a sum sen hautak lo zawk a an tan ruahmanna siam a ni chu lawmawm a tih thu a sawi a. RD block sawn chungchanga mawhphurtu te chungah pawh lawmthu a sawi bawk a ni.
Parliamentary Secretary Pu TT Zothansanga chuan khaw mipuiten an tana ruahmanna siamsakah an lawmzia an lantir thiam chu entawntlak a tih thu a sawi a. Khawtlang hmasawnna atan Sorkar atangin tanpuina eng eng emaw pawh lo la kal thei anih thu leh, chungah chuan Sorkar hmalakna tawiawm tha turin a chah a. Sorkar tawiawm nachang hria chu khawtlang hmasawnna atan thahnemngai an nih thu a tarlang a ni.
Vawiin hunah hian RD Minister hi RD Department atangin official eng emawzatin an tawiawm bakah Champhai DC leh officer dangte an tel a. Zokhawtharah Minister ho hian lawmna hun tawite buatsaih a ni bawk a. RD Block thar lawmna denchhen hian Mualkawiah hian lungphun phun a ni.
