Vawiin khan Horticulture, Social Welfare leh Local Administration Department-te enkawltu Minister Pu P. C. Lalthanliana chuan Horticulture Department-in loneitu a bik takin thlai, thei leh pangpar chingtute tana hmun pawimawh tak a buatsaih, zirna leh thurawn an lakna tur hmunpui Centre of Excellence (CoE) Thingdawl chu a hawng a. He hmun pawimawh hawnna programme ah hian Parliamentary Secretary Pu K. Lalrinthanga pawh a tel a ni.

Centre of Excellence, Thingdawl hawnna programme Pu B. Lalhmingthanga, Secretary Horticulture Department kaihhruaiah Horticulture Minister Pu P.C. Lalthanliana chuan Centre of Excellence hi kuthnathawktu a bik takin Kolasib District chhunga ami ten tangkai taka an hman beisei thusawiin Mizoten kan tharchhuah kan tihpuna, kan intodelha, nakin zelah kan tharchhuah state pawna kan thawchhuana  atan he hmun hi malsawmnnaa nih a, kuthnathawktu te kawng kawhhmuhtu hmanraw pawimawh tak nise ka duh a ni, a ti a. A sawizelnaah Minister chuan Zofate nunphung leh khawsak dan ngaihtuahin Horticulture hi kan inhmeh ber niin a lang a, Pathian in eizawnna kawnga min pekah ngaia Sawrkar leh kuthnathawktu ten tih tak takna nen  hlawhtlin duhna rilru pu a hma kan lak a, kan thawhho a ngai a ni, a ti.  

Horticulture Minister chuan kuthnathawktu te hi Sawrkar in a duhsakin a ngai pawimawh a, an tan inbuatsaihna leh remruatna tha tak tak a siam thin a, chutih rualin Sawrkar ban in tlin chin a nei tih hriat a pawimawh a, chuvangin kuthnathawktu te pawhin engkimah Sawrkar rinchhan leh innghat lova an mahnia hma an lak thiam a tul a. Sawrkarin kuthnathawktu te tan inzirtirna leh tanpuina te pe thin mahse a hlawhtlinna tak tak chu an kutah a awm a ni, a ti a. He huna Horticulture Department-a thawk officer leh thawktu kalkhawmte chu sum chauh hi hlawhtlinna a ni lo tih hria an thiamna leh an hriatna te chu an Department Budget pui ber a ni tih hre reng chunga chutiang rilru leh ngaihtuahna senga kuthnathawktu te tan ruahmanna siam turin a fuih bawk a. Lunglei District tan Haulawng bulah Centre of Excellence ruahman mek anih thu te, Thenzawla Horticulture College sakna atan Land Lease chu Vice Chancellor, Central Agricultural University hnenah hlan a nih thu leh he college sakna atan ruahmanna siam mek anih thu te a thusawi ah hian Minister hian a tarlang bawk a ni.    

He hun hmanpuitu dang Parliamentary Secretary Pu K. Lalrinthanga chuan Mizoramah hian thlai chi hrang hrang a chin vek theih tih hi kan sawi uar a mahse eizawnna tlak a nih em tih hi kan ngaihtuah a ngai a, a hmun leh a boruak a zirin thlai kan chin tur kan thlan thiam a tul a ni, a ti a. Centre of Excellence hi kuthnathawktu ruahmanna siam puina, kawng kawhhmuhna hmun leh zirtirna pekna hmun atan siam anih thusawiin, thlai te enkawl chhoh leh tihpuitlin chu loneitu te mawhphurna a ni, a ti a. NLUP hnuaia Horticulture Trade thlang an tam dan enin Horticulture hi tun dinhmunah chuan kan eizawnna bulpui ber nia hriat a ni, a ti bawk.

Pu H. Lalengmawia, IAS, DC Kolasib chuan Centre of Excellence hawn a ni ta chu Kolasib District tan mel lung chhinchhiahtlak tak anih thusawiin a kal zelnaah a thawktu te chuan innovation, thil awm sa atanga a tha zawk an ngaihtuah thiam leh creativity, an rem hriatna atanga thil duan chhuah an thiam a ngaih dawn thu te sawi lang a ni.

He hmun sak dan leh a chanchin te chu Divisional Horticulture Officer, Kolasib Division Pu Lalthlamuana chuan Technical Report a sawinaah a tarlang a. Hun hi Pu R. Zotawna, Diretor, Horticulture Department chuan lawmthu sawiin a khar a ni.

Thingdawla Centre of Excellence hi National Mission for North East & Himalayan States (HMNEH) hnuaia kum 2013-14 atanga ruahman a ni a. A zau zawng hi hectare 21.85 niin hectare 3.3 ah thlai chin a ni a, hectare 0.98 ah greenhouse siam niin hectare 0.44 ah tui dahkhawlna siam a ni a, ram chheng chhia hectare 4.80 leh reserve forest hectare 11.88 te a awm bawk. Greenhouse ah hian square metre 2240 chu rose chinna atan, square metre 1560 chu Gladiolus chinna atan, Primary nursery atan square metre 900 leh Secondary nursery atan square metre 2614 te hman mek a niin square metre 2500 ah thlai chi kui thiahna atan ruahman a ni bawk. Tun dinhmunah hian Buddlings(orange) 2500, Rootstock seedlings 12000, kuhva tiak 20000, purun tiak 3,00,000, Knol khol tiak 40,000 leh bottle brush tiak 1500 an nei mek a. He hmun atang hian nikum October leh kumin November inkar khan thlai leh thei tiak nuai 20 lai vel an semchhuak tawh a ni.