Vawiin khan ITC Training Hall Hnahthial ah Calathea (Daily News Paper) Silver Jubilee lawmna neih a ni Pu S. Laldingliana Vice Chairman HPC, Lunglei chu khuallian niin a hmanpui.

He lawmna inkhawm hi Pu VL Liansanga News Editor Calathea in a kaihruai a. Khuallian Pu S. Laldingliana chuan thusawiin Calathea chanchin bu in kum 25 a tling thei hi a lawmpui a, Hnahthial mai bakah Zoram pumpui tana thu thehdarh hmang a rawngbawl theia a awm hi a fakawm a chanchinbu mai bakah Hnahthial hmangaih tu leh kawng hrang hrang a hmasawnna ngaihtuahtu a ni a ti. Sports lamah pawh talent nei tha tak te phochhuak tu a ni a ti.

Pu Kanan Gopinathan IAS, SDO(C), Hnahthial pawh in thusawiin Calathea kum 25 tlin hi a lawmpui a, chanchinbu mite hi Democracy ah chuan sorkar leh mipui te kara leihlawn a ni a, kan darthlalang a ni fo thin a, zalen takin sawrkar siamthatna kawng ah fuih tu leh siamtha thu ni theuh turin a duhthu a sawi. Pu Vanlalrema Vantawl, President MJA General Hqrs. Aizawl chuan thu sawiin Calathea kum 25 tling hi a lawmpui hle a, MJA te hi rilru inhawng leh inpawh tak kan ni a, Lunglei leh Hnahthial MJA te hi thu tha leh thu dik pua chhuah na kawng ah Officer leh sum dawng ten an puithin hi a lawmawm hle a ni a ti. Media te hi darkar 24 mipui rawngbawl nan hna kan thawk thin a, damloh leh chawlh thianglo a ni a ti.

Pu.K. Lalrinpuia President MJA Lunglei pawhin a lawmpuina thu sawiin Calathea huang chhungah thawhhona tha leh inpumkhatna tha awm se a duhthu a sawi. Pu F. Zosangliana Editor Calathea chuan lawmthu sawina hun a hmang bawk a ni.

He chanchinbu hming Calathea hi Pu Lianngura Sailo in a a phuah niin, Lalrinliana Sailo chu Editor hmansa bera ni a, tun ah hian Pu F. Zosangliana chu editor niin he chanchinbu hi a enkawl mek a ni.