Pu Zodintluanga, UD & PA Minister chuan vawiin khan Vanapa Hall-ah Bawlhhlawh mumal leh tha zawka sawngbawlna atana inbuatsaihna tan hun a hmanpui. He hunah hian AMC Councillor thlan thar te, Aizawl khawchhunga Local Council 83 te leh Department hrang hrang te an tel a ni.
Minister chuan Clean Mizoram leh Swachh Bharat Mission (Urban) - Bawlhhlawh mumal leh tha zawka sawngbawlna atana inbuatsaihna tan hun Kick-Off Programme a a kal thei chu lawmawm a tih thu sawiin Central Sorkar-in National Urban Sanitation Policy kimchang tak neiin state tinte khawtlang invawnfaina tur leh vantlang hrisel nana thawh tur hmachhawp a neih thu a sawi a. Hemi ti hlawhtling tur hian sorkar in theih tawpin hma a la mek a ni ti a. Minister chuan Aizawl khawpui tih hmasawnna tur atan projects hrang hrang :Water Supply System tih changtlunna te, kan thli leh bawlhhlawh (Sewerage & Sanitation) paih faina tur siam te leh bawlhhlawh (Solid Waste) te mumal leh thianghlim zawka tih ralna turte in UD & PA Department in hma a lak mek thu a sawi a.
Pu Zodintluanga chuan Mizoram mipui, mimal leh vantlangte tlawmngaihna leh thahnemngaihna avanga bawlhhlawh sawngbawlna kawnga a tih that em avangin ‘SKOCH AWARD, 2015’ pahnih lai dawn anih tawh thu sawiin Asian Development Bank pawisa hmanga hmasawnna hna thawktu North East State hrang hrang zingah Mizoram sorkar chu Capital Cities Development Investment Programme a thawh tha avangin North East State dangte sum hman ai Rs. 360.27 crore lai mai hmasawnna hnathawh tur project thawh belhna tur ADB hian a pek belh thu a sawi bawk.
Minister chuan Solid Waste Resource Management Project atan Rs. 33.08 crore ruahman a nih thu sawiin a bul tan nan bawlhhlawh bawm pahnih theuh Aizawl khawpuia chhung tin te pek tura ruahman a ni a, bawlhhlawh lakkhawmna tur lithei/garbage vehicle te, a sawngbawlna hmun turte pawh tender koh mek a nih thu a sawi bawk.
Dr. C. Vanlalramsanga, Secretary, UD & PA pawhin thusawiin Mizoram chu Bawlhhlawh mumal leh tha zawka sawngbawlna atana inbuatsaihna (Source Segregation on Solid Waste Resource Management) hmasa ber anih thu sawiin Aizawl mipuite hian nitin bawlhhlawh 1,59,880 kgs a paih thin thu a sawi a. Er. Valbuanga, Project Director, SIPMIU chuan Solid Waste Resource Management chungchang a sawi a, Pu Zorammuana, Director, UD & PA chuan Swachh Bharat chungchang a sawi bawk.
