3117/2023-2024

Dated Aizawl, the 19th December, 2023: Vawiin khan Prof. S. Sundar, Director, NIT, Mizoram chuan Chief Minister Pu Lalduhoma chu a pisaah hmuin lawmpuina a hlan a. NIT Mizoram dinhmun tlangpui hrilhin a tihhmasawn zel dan turte an sawi dun.

He hunah hian Chief Minister chuan, NIT Mizoram chu a kal zelna turah duhsakna a hlan a. Mizoram tana zirna in hlu, kan thalaiten thiamna changkang ber ber hmuh nana an inzirna hmun pawimawh a nih avang a thain a rintlak tur a ni a. Zirna in tha leh rintlak a nih theih nan thawktu lak leh thil dang reng rengah politics a inrawlh tur a ni lova, politics nena inhnamhnawihna lam chi reng reng lakluh kan phal lo, a ti. Politics hmanga innawr luihna lam chi lo hlau lo tur leh chutiang thil a awm a nih chuan rang taka hrilh hre thin turin Director hi a chah nghe nghe. Heng bakah hian NIT Mizoram hmasawnna tur thil pawimawh hrang hrangte an sawi dun a, remchangah an hmunhma te hmuhpui a tum thu a hrilh bawk.

NIT Mizoram hi a tir lamah NIT Nagpur hnuaia bul tan a ni a, kum 2011 atang khan mahnia inrelbawl tanin tunah hian Course hrang hrangah zirlai 900 chuang an awm mek a ni. NIT Mizoram atanga zirchhuak te hian hna tha tak tak an hmu deuh vek thin a, nikum exam hnuhnung ber atang pawhin za zela sawmriat te chuan hna an hmu nghal a ni. Programme leh project engemawzat an kalpui reng bakah ram chhung leh ram pawna zirna in tha tak takte nen an inthlunzawm bawk a ni.