3118/2023-2024

Dated Siaha 19th December 2023: Vawiin khan Pu Lalhmunsanga Hnamte, District Election Officer leh Chairman, District Level Standing Committee on Revision of Photo Electoral Rolls -ni bawk kaihruaiin ni 1, January 2024 tehfung a hman 'Special Summary Revision of Photo Electoral Rolls' chu DC Mini Conference Room-ah neih a ni.

Pu Lalhmunsanga Hnamte chuan thawhhona tha tak avangin MLA inthlanpui felfai taka zawhfel a ni tih tarlangin, Election- a mawhphurhna nei zawng zawngte thawhrimna leh Political Party-te tawiawmna tha tak vang a ni tiin lawmawm a tih thu a sawi a. Nakkum a Member of Parliament (MP) inthlanna neih turah pawh thawhhona leh intawiawmna tha tak a awm leh ngei a beisei tih a tarlang.

Draft Electoral Rolls chu January ni 6, 2024 - ah chhuahfel hman anih tur thu sawiin Pu Lalhmunsanga Hnamte chuan February ni 8, 2024- ah Final Electoral Roll- tlangzarh a nih tur thu a tarlang bawk. Electoral Roll- buatsaih chu thil awlsam anih loh thu sawiin, a buaipuituten theihtawp chhuah tura chahin mipuite leh political party-te tawiawmna tha a ngen nghal bawk.

Vawiin thutkhawmah hian Polling Station thar hman leh Polling station hming thlak ngai chungchang ngaihtuahho nghal a ni a.

Pu Vanlalchhuanliana, Election Officer chuan Polling Station zawng zawngte chu Election Commission of India remtihna leh hriatpuina a nih a tul tih sawiin chumi atan chuan 'Rationalization of Polling Station' neih thin a ni, a ti a. Polling Station- tura thlan chhuahte chu District Level Standing Committee- in a pawm hnuah Chief Electoral Officer (CEO) Office -lamah pawmpui turah thawn leh thin a ni, a ti. Polling Station hming thlak ngaiah bik chuan CEO Office -lamin an pawmpui a ngai a, Polling Station building thar hman turah erawh chuan Election Commission of India (ECI) pawmpuina a ngai ve thung a ti. Polling Station- atan hian a panna hmunhma nuam, hmun laili leh Assured Minimum Facilities (AMF) awmte thlan thin a ni tih a tarlang bawk.

39-Saiha (ST) Assembly Constituency-ah hian Polling Station hming thlak ngai pali (4) leh building thar hman tura ruahman pahnih (2) a awm a. 40-Palak (ST) Assembly Constituency-ah hian Polling Station- building thar hman tura ruahman pasarih (7) a awm bawk a. Heng Polling Station hming thlak ngai leh building thar hman tura ruahmanna siam te hi 'District Level Standing Committee on Rationalization of Polling Stations' chuan lungrual takin a pawm a ni.