Chief Minister Pu Lal Thanhawla’n vawiin khan Power & Electricity Officers’ Association (PEOA) General Conference vawi 16-na Aijal Clubah a hmanpui.

Chief Minister chuan tunlaiah sorkar hna harsat laia engineerten an zirlai zir zo a sorkar hna thawk thei dinhmuna an awm chu an vannei hle a ni a ti a. Sorkar hnain zirchhuakte a dawl zawh tawh loh avangin thalaiten eizawnna an neih theihna turin thiam thil zirna skill development sorkar chuan a kalpui mek a ni a ti a. Chuvangin sorkar hnathawkte chu thahnemngai taka thawka, sorkar atanga hamthatna leh duhsakna tam tak an dawn ang hu thawk turin a chah a ni.

Chief Minister chuan field workah indaih lohna a tam tih sorkarin a hria tih sawiin, a tul mamawh zual tak ngial pawh hnawhkhah a harsa a ni a ti a. Field Officerten an nau hnathawkte ngun taka vil tur an ni tiin, fieldah an vak chhuak tam tawkloa a hriat thu a sawi a, tan la turin a fuih a ni. Chief Minister chuan power generation chu engineerte kutah a awm thu sawiin, Mizoram lui zawng zawng deuhthaw chu khuap tura thuthlung ziah tawh, mahse sik leh sa danglam chho zelah kalpui tur a ni ang em tihte chu engineerte kutah a awm a ni a ti a. Natural Gas kan neihte pawh a hman tangkai theih dan tur ngaihtuahtu tur an ni tiin, tunah hian hmala turin state level committee din tum mek a ni a ti.

Chief Minister chuan hmasawnna tur project hrang hrang kan neihte tha taka kalpui anih theih nan leh kuttlinglova sum lak tumte laka kan invenna turin Revenue department nen a hmunhma endikna kawngah thawhho a tul a ni a ti a. Department hrang hrang ten project kan neih ang angte inpawh taka inngaihven tawn sak thin a pawimawh hle a ni a ti.

Khawvela technology inthlak chak takah a chhuak thar ber umphak zel thei turin engineerte chu Pu Hawla chuan a chah a. Thil kan hriat lohte chu hriat loh ngam a, a hriate zawt hrehlo turin a chah bawk a ni.

Chief Minister hian magazine “Kawlphetha 2015’ tih a tlangzarh bawk.

Khualzahawm Pu R.K Gupta, Commissioner, P&E pawhin thusawiin, engineerte chu thil thar awm apiang zirchian thiam turin a fuih a, hnathawhnaa himna ngai pawimawh thin turin a chah bawk.

PEOA hi kum 2000 April ni 20 a din a ni a, tunah hian member 140 awmin, 116 te chu Electrical Wingah awmin, a dang 24 te chu Civil Wingah an awm a ni.

Conference hi Er. Lalramliana, President, PEOA in a kaihruai a, chawhnu lamah agenda chhawpchhuahte sawihona an nei nghal bawk a ni.