Chief Minister Pu Lal Thanhawla chuan vawiin khan Vanapa Hallah Right to Information (RTI) Week a hawng.

Chief Minister chuan RTI dan hi Mizoramah hman tan anih atanginkanhmang tha thawkhata a hriat thu a sawi a. Duhthawhna avang erawh chuan tan lak angai a ni a ti. RTI Act hi India ramah Mizoram chu a hmang thate zingah a awm chu a lawmawm hle ani a ti a. Democracy tha siam nan te leh hlemhletna venna bakah langtlang sorkar siam nan tangkai tak ani a ti a. Mizoramah sorkar tha kan mamawh rualin mipui tha kan mamawh bawk a, chuvangin mahni theuh hi kan felfai chuan sorkar tha leh dik kan siam thei a ni a ti. Thil dik duh tan tupawhin RTI Dan hi hman theih a ni tiin, tlawmngai pawlte leh civil society te hian sorkar khalh ngil nan thahnemngai taka hmang turin a ngen a. RTI hmanna tur awmlo leh hman tlem hian sorkar dik leh tha a awm tih a entir mai zawk em tihte ngaihtuahnaah a awm thin a ni a ti..

Chief Minister hian RTI Act chungchanga college leh MZU Zirlai ten essay ziah intihsiaknaa ti thate hnenah pawisa leh certificate a hlan a ni.

Mizoram Chief Information Commissioner Pu Laldingliana, IFS (Rtd) chuan kalkhawmte leh sawmbikte lawmna thu sawiin, RTI Act hi Mizoram sorkarin a ngaihpawimawh avangin kan vannei hle a ni a ti a, state dangten min awt hle a ni a ti. Mizoram Information Commission duh ber chu mipuiten RTI Dan hi tangkai taka hmang thin se tih hi a ni a ti a. India ram pumah kal zel dan tur leh tha zawka leh tangkai zawka an kal theihnan Federation of Information Commission pawh a khat tawka meeting an neih thin thu a tarlang bawk a ni.

Mizoram Information Commission Nodal Department, I&PR Director Pu Jim K.Chozah pawhin thusawiin, Mizoramah RTI act hman tan anih dawna mi  pathum thlan chhuah ten Guwahati ah RTI Dan chipchiar taka an zir thu a sawi a. RTI Act hi tha taka hman anih theih nan dan hi upgrade chhoh ve reng tul a tihthu a sawi bawk a ni.

RTI Week chhung hian district tinah hman chhoh zel a ni dawn a ni.