Chief Minister Pu Lal Thanhawla chuan vawiin khan Serchhip BDO office bul, P&E Veng-ah BNRGSK Block Hqrs building a hawng.

Hawnna inkhawm building hawn tak hall-a neihah Chief Minister chuan building a hawn tak chu tha tak leh rintlaka sak anih tih report a ni chu a lawmawm hle a ni, a ti a. Sorkar suma in sakte hi hnam rotling ni tura sak an ni a, chuvangin a sa tu ten rotling ngei turin an sa thin tur a ni, a ti a. Building chu tangkai taka hmang thin tura chah in, a hmang tute leh a neitu ten a vawnfai thu ah mawh an phur a ni, a ti. Chief Minister chuan kan awmna apiang hi Pathianin a rawngbawl tura min dahna a ni a, chuvangin tui takin kan thawk tur a ni a, rinawmnate, taimakna te leh dikna ten a rawn zui ve mai dawn a ni, a ti.

Chief Minister chuan Serchhip khawpui motor kawngpui tha taka siam a nih thu ah, a siam hna khawtlangin uluk taka an vilna leh an tanrualna rah a ni tiin, lawmthu a sawi bawk a ni.

BNRGSK building hi Rs. 28,91,040/- senga sak a ni a. Mizoram State Rural Livelihood Mission hnuaia kal chhohpui tur, Mizopa chhiara chhawng hnih, a chung ah hall, a hnuai office tur niin, a len zawng hi 52 feet a sei leh avang 40 feet a ni. Hall hi a duh apiang tana hman hawh theih a ni dawn a. Tui, electrict, sound system, chair 100 leh power backup generator dah vek a ni. Inkhawm hi Pu Malsawmtluanga, BDO, Serchhip-in a kaihruai a ni.

Building hawnna inkhawm neih zawhah hian Chief Minister chuan Serchhip Rural Block Development hnuaia Rural Housing Scheme atangin mi thlan bik te hnenah a hmingin (token) inchung tur rangva GCI Sheet a sem a. Chief Minister chuan kum 1990 chho vela rangva an sem khan nasa taka mi sawisel an tawk tih sawiin, miretheite hnena inchung tur rangva sem chu Pathian lam tang programme anih avangin kan thil tih ah kan chiang a ni, a ti a. Mamawh ang zelin sem chhoh zel a ni ang, a ti. Serchhip bial chhunga rangva dawng tura thlanchhuahte hi an vaiin chhungkaw 70 an ni a, chhungkaw khatin bundle 4 zel an dawng dawn a ni.