Vawiin chawhnu dar 01:00 khan Lalthanhawla Higher Secondary School, Serchhip chuan an sikul bul New Serchhip YMA Hall-ah kumin HSSLC result an neih that an lawm a, Bialtu MLA, Chief Minister leh he sikul hming put chhan ni bawk Pu Lal Thanhawla chuan khuallian niin a hmanpui a ni.

Khuallian chuan ama hming chawia zirna in din tum an awm fo tawh thu sawiin, a remtih ngai loh thu leh hmingchawi chhantlak a awm loh thu a sawi a. Serchhip khawtlang pawhin he sikul an din dawna an rawn thu te leh rem a tihbik loh thute, ama hming chawi a nih vanga a tel ve kher lem loh thute pawh a sawi a ni. Amaherawh chu khawtlang mamawhna a san em avang leh mipui tahawhna a nasat avangin khawtlang hruaituten mahni ke a din inhuamin, lungrual takin an lo din ta a, sikul la naupang tak a ni chunga hetiang result tha a nei thei chu a lawmpui takzet a ni, a ti.

Chief Minister chuan Mizoramah zirna in tam tak, sawrkain sum tam tak senga a enkawl ‘Nil’ result nei an awm fo thu sawiin hetiang sikulte chu tihtawp a, a thawkthate tha lehzuala an thawh theih nana chawmdawl a that zawk a rin thu a sawi bawk. Pu Hawla chuan Mizoram sawrkarin world class education neih tumin theihtawp in tan a la a, tualchhung mite mai bakah zirna lama India rama mi thiam ber berte kaihhruaina hnuaiah Education Reforms Commission te dinin chu commission chuan zirnain hma a sawn nan rawtna tha tak a siam a, amaherawhchu tihlawhtling turin sum tam tak mamawh a nih avangin leh kan state in thawhchhuah kan neih tlem rih si avangin tun dinhmunah kan phak tawk ang zelin a tha thei ang berin he recommendation hi kan bawhzui mek a ni, a ti bawk a ni.

Lalthanhawla Higher Secondary School hi kum 2011 a din a ni a, Arts leh Commerce zir theih niin tun dinhmunah Principal nghet tur ngaihtuah mek a ni a, lecturer 15 an awm mek a, Arts lamah subject 7 leh Commerce Stream-ah subject 3 a awm mek a ni. He sikul hian din a nih atangin HSSLC exam vawi hnih an hmachhawn tawhah 100% an la passed ve ve a ni.

He hun hi Pu PC Vanlalsawma, Chairman Managing Committee,Lalthanhawla Higher Secondary School chuan a kaihruai a, Serchhip khawpui chhunga department hrang hrang officer-te leh khawtlang hruaitute an tel tha hle a ni.