Chief Minister Pu Lal Thanhawla chuan vawiin khan Serkhanah Lal Thanhawla High School-in kum 20 a tlin lawmna a hmanpui.

Chief Minister chuan a remtilo chunga a hmingchawia Serkhan khawtlangin Lal Thanhawla High School an din chuan kum 20 alo chuangkai thei ta chu a lawmawm hle a ni a ti a. Serchhipah pawh khawtlangin an duh tlat avanga a remtilo chunga a hmingchawia Lal Thanhawla Higher Secondary School an din bawk thu a sawi a. Pu Lal Thanhawla chuan a hmingchawia school han din chhan tur a neih loh thu leh zahthlak atih thu sawiin, khawtlangin an duh tlat avangin an din lui a ni a ti a. Managing Board leh zirtirtu ten nasa taka tan an lak avanga hetiang dinhmuna ding thei an ni a ti.

Chief Minister chuan thangthar ten Mizo tawng an tihchhe mek nia a hriat thu a sawi a. Mizo tawng hi tawng hausa tak, chawi nun leh humhalh tlat ngai a ni tiin, School chu hemi lama bul tanna hmun tur a ni a ti a. Thalaite tana khawvel thar din sorkarin a tumna ah infiamna lamah chuan nasa takin hma kan sawn a, zirna lamah world class education siam tum mek anih thu a sawi bawk a. World class education tih hian hman tlak leh chhawr tlak, ram pawn thlenga chhawr tlak tur chherchhuah hi a ni tiin, zirna sang zawk in din chhoh chauh a kawklo a ni a ti. Chuvangin zirtirtute hi an pawimawh em em a ni a ti.

Lawmna inkhawmah hian Pi Lal Riliani, President, Indian Society on Tobacco & Health, Mizoram Chapter chuan Souvenir tlangzarhin, zuk leh hmuamin hriselna atih chhiat theihzia leh a hlauhawmzia uar takin a sawi bawk a ni.

He high school-in kum 20 a tlin lawmpui nan Chief Minister hian plastic arm chair 25, football leh jersey set khat leh volleyball leh net a pe a, lawmpuina thu inziak tar tur frame a pe bawk a ni.

Lal Thanhawla High School hi kum 1993 ah dinin kum 1995 khan sorkar atanga school din phalna an hmu a. Kum 2003ah lump sum grant in aid ah hlankai a ni a, kum 2008 khan recurring grant in aidah hlangkai lehin hemi kum atang hian zirtirtute hlawh chu sorkarin a tum sak ta a ni. Kum 2012 khan Mizoram Board of School Education (MBSE) ah a in affiliate ve leh a ni. Kumin 2013 a HSLC resultah 90% in an passed a ni.

Lawmna inkhawm hi School kawtah buatsaih a ni a,Pu K.Lalrema, VCP in a kaihruai a ni. Chief Minister hi Pu Lalsawta, Education Minister leh bialtu MLA Pu Hmaingdailova Khiangte ten an tawiawm a ni.