Vawiin khan Parliamentary Secretary to Chief Minister Pu Lal Thanzara'n iron rod siamchhuahna hmun Mizoram Ispat Industries (MII), Lengte a tlawh.
MII, Lengte-ah hian kum kalta July ni 11 atang khan iron rod siamchhuah hna hi thawh tan a ni a. Nitin metric ton 50 atanga 60 siamchhuak ziahin thla khat chhungin metric ton 900 bawr vel an siam chhuak hman a ni. MII hotute sawi danin an khawl neih hi thla khata metric ton 3000 vel siamchhuak thei tur a ni a, tun dinhmunah erawh kawlphetha leh thildanga harsatna avangin an la phalo nasa hle. An iron rod siam chhuah hi Indian Standards Institute (ISI) chhinchhiahna chuang, quality tha ni chung sia a man a tlawm avangin hralh a tla hle niin ISPAT Coordinator chuan a sawi. Mizoram chhunga thirchhia tam tak hi raw material atana hmangin iron rod tha leh hman tlakah an siamchhuak a, Aizawl khawpui leh a chhehvela thirchhia tam ber hi he industry-ah hian hralh thin a ni.
MII, Lengte hi sumdawng pariat inkawp (partnership) a kalpui niin an zingah hian Mizo pakhat C Lalduhawma a tel ve a. Tun dinhmunah Lengte khua leh a chhehvel atangin Mizo 60 velin hna an thawk niin MII hotute chuan an sawi.
Parliamentary Secretary Pu Lal Thanzara hi Aizawl DC Dr.Franklin Laltinkhuma bakah Industries Addl.Director Pu Lalbiakthanga, Power & Electricity Department a Executive Engineer Pu Ngursailova leh mi pawimawh dang ten an tawiawm.
