Chief Minister Pu Lal Thanhawla chuan vawiin chawhnu khan Khatla ah Veterinary Polyclinic Hospital a hawng.

Chief Minister chuan District Council hunlaia ran entirna (Vety clinic) kan neih atang chuan kan thleng sang tawh hle a ni a ti a.Heng hmasawnna kan neihte hi ringtu kan nih angin kan thlen chin zel a tanga hmasawn kan tumzia a tilang a ni a ti a.Ran vulh hi kan pipute atang tawha chhung tinin kan tih ngei ngei thin a ni tiin, ran vulh hi sum leh pai lakluhna tha tak anih bakah midangte inhlawhna a siam thei a ni a ti a. Kan sorkar chuan ran vulh hi a ngaipawimawh hle tih sawiin, NLUP hnuaiah pawh mi tam takin eizawnna atan an thlang a ni a ti a. Ran vulhte hrisel taka enkawl an nih theihna tura Veterinary Polyclinic Hospital changtlung tak kan nei thei ta hi a departmenta thawkte thawhrimna rah a ni a, a lawmawm tak meuh a ni a ti. Department hmasawn nih tum hi kan tum vek tur a ni tiin, hmasawn turin englai pawha kan ngaihtuahna kan vaivir reng a tul hle a ni a ti.

Chief Minister chuan Veterinary Polyclinic Hospital hawn theih ani ta chu ram tan hmasawnna rahbi pawimawh, department tan ni chhinchhiah tlak a ni a ti a. Hmasawn tura enchhin tul awm zawng zawngte enchhin zung zung a tha a, ran hrisel zawk kan neihna tura damdawiin changtlung tak kan nei ta hi a lawmawm hle a ni a ti.

Chief Minister hian bawng vulhtu mi 4 thlanchhuahte hnenah bawnghnute sawrna ‘milking machine’ a hlan bawk a. A dawngtute hi bawng 33, 18, 10 te leh 4 vulh lai mektute an ni.

Khualzahawm Pu H.Liansailova, Vice Chairman, State Planning Board chuan Vety department chu department hmasawn chak tak, changtlung tak leh entawntlak tak nia a hriat thu a sawi.

Khualzahawm dang Pu C.Ngunlianchunga, Minister of State for AH&Vety chuan doctor thiamna bik nei, specialist te awmna tur polyclinic hospital hawn ani chu hmasawnna mellung pawimawh tak a ni a ti a. A department enkawlin kawng tam takah hmasawn zel tura hmalakna chi hrang hrang an neihte a tarlang bawk a ni.

Veterinary Polyclinic Hospital hi ran vulh hriselna enkawltu doctor, kawng hrang hranga thiamna bik nei, specialist te hmun khata an awmna tur hmun a ni a. Ran natna ven, enfiah leh enkawlna kawngah hospital hian hma ala dawn a ni. Tunah hian Aizawl khawpui chhungah nitin ran enkawl ngai 120 ziahluh thin a ni a, clinic pan theilo ran damlohna hmuna pan mobile case 25 awm nitin bawk a, hei vang hian he polyclinic hospital hi neih makmawh a tul tak avanga sorkarin a din a ni a.Department hrang hrang pathology, surgery, medicine, gynaecology leh a dangte a awm dawn a ni. Sepecilaist doctor awmsa ten an enkawl ang a, administration lam chu Joint Director enkawlna hnuaia awm tur a ni.

Polyclinic hospital sakna sum hi DoNER atanga hmuh niin, Rs. 482.30 lakhs sanction a ni a. A building civil works hi PWDin Rs.264.13 lakhs sengin an sa a, Vety departmentin bungrua leh hmanruate lei nan Rs.207.43 lakhs an hmang bawk a ni. Kum 2012 September thla a sak hna tanin kumin 2016 February thla tir khan PWD in Vety departmentah an hlan a ni. A building hian basement 2 neiin, kawng an, ground floor bakah achungah chhawng hnih ala awm bawk a ni. Building zau zawng hi 1323.25 sqm a ni a, room hrang hrang In-patient hospital, pathology room, operation theatre, laboratory, doctor room, conference room leh a dang dang, avaiin room 18 a awm a ni.

Hawnna inkhawm hi polycilic conference roomah neih niin, Dr.L.B.Sailo, Director, AH& Vety in kalkhawmte lawmna thuchah a sawi bawk a ni.