Vawiin khan Sericulture Department chuan Sericulture Minister Dr. B.D. Chakma Office, New Secretariat Complex-ah tun thla tawpa pension mai tur, an Secretary Pi Lalsangpuii leh Joint Secretary Pu Zotawnlien Joute chu  department hmingin an thlah.

Pathian malsawmna dawnga pension thlenga Officer pahnihten an hna an chelh thei chu an lawmpuiawm a ni tiin Sericulture Minister chuan sawrkara an hna chawlhsan mahse hun lo kal zel turah ram tana an hnathawh chawlhsan mai lovin an theih anga hma la zui zel tur a chah in kawng engkimah tha taka an hun an hman theih nan duhsakna a hlan a ni.

Pension-a kal chhuak Officer pahnihte pawhin Sericulture Department-a thawhhona tha tak an neihah lawmthu sawiin inthlahna thu pawimawh tak tak an sawi ve ve a ni.

Pi Lalsangpuii hian kum 1988 April thla khan Superintendent hna Finance Department-ah chelhin chuta tanga kaichho zelin kum 2015 March thla khan Secretary, Sericulture/Fisheries hna chelhin a pension thleng a thawk a ni.

Pu Zotawnlien Joute hian kum 1977 khan zirtirtu hnaa bul tan in kum 1984-ah Assistant Jailor a ni a, chuta tanga Department hrang hranga thawka kai sang chho zelin kumin kum tir khan Joint Secretary, Sericulture hna hi chelhin a pension ta a ni.

Inkhawm kaihruaitu, Pu Lalrinmawia, Sericulture Director pawhin  thlahna thu leh an hun kal zel tur atana duhsakna thu a sawi a. Heng Officer pahnih te hi  thawhpui nuam tak  leh  mahni hna ngaipawimawh tak an niin  an Department chuan Officer fel tak  pahnih a ruala an chhuah mai tur chu an uihawm hle ani  a tih rualin  an pension thlenga  an hna an chelh theihnaah erawh a lawmpui thu  a sawi. Secretariat leh Directorate office atang hian ngaihhruina thilpek an hlan ve ve a ni.

Pu Vanlalfakzuala, Under Secretary of Sericulture-in lawmthu sawiin programme a khar a, thingpuite in hovin thlalakhonate an nei.