3556/2024-2025

Dated Aizawl, the 16th December 2024: Vawiin khan Dawrpui Multipurpose Hall-ah Chief Minister, Pu Lalduhoma chuan, Mizorama Rubber chin theihna hmun zawng zawnga rubber chin vekna tur Chief Minister's Rubber Missions chu a hawng. Pu Lalthansanga, Minister, LR,S & WC chu khualzahawm a ni.

A hawnna inkhawmah hian Mission bultanna tur RIDF XXX atanga Rs. 27.98 crore sanction na lehkha chu Chief Minister hnenah hian Pi Pankaja Borah, GM NABARD, Regional Office, Mizoram, chuan a hlan a. He sum hmang hian district 7 ah zau 24 ah bultan tur a ni.

Thu a sawinaah Chief Minister chuan, "Tun hmain kan loneitute hnenah thlai chin tur kan kawhhmuh a, nimahsela kan thlai kawhhmuh kha a lo fuh tawk lo fo va, an beidawng thin. Hmalakna tam tak kan lo kalpui tawh thin na a, tunah hian kan ram hi han en ila, hmun zau tak tak hi a la awl duai mai a ni. Heng kan ram ruak, rubber chin theihna hmunah te hian khuarei daih, a hralhna lama harsatna awm ve ngai lo rubber hi ching vek mai ila, a ching duh apiang chu chintir bawk ila. Kan la thatpui tur a ni. Thlai tam tak kan lo ching thlawn tawh thin a, rubber hi chu kan ching thlawn lo vang," a ti a. "Vawiina Mizorama kan kuthnathawktu tui tak tak ho hi kum upa tawh lam te, pensioner te an ni fur mai a. Kan thalaiten kuthnathawh hi rawn tui se, thapui thawhin rawn bei se kan duh a ni" a ti bawk.

Khualzahawm Pu Lalthansanga, Minister pawhin thusawiin, "He mission hi Chief Minister Pu Lalduhoma leh Rubber Board of India Chairman Dr. Sawar Dhanania te ngaihtuah chhuah a ni a. Mizoramin bung thar kan kaina tur hmalakna a ni. Department lam kan inbuatsaih nasa a, kan phur a ni," a ti.

Mission hawnna inkhawmah hian Pu Lalsangliana, Secretary, Land Resources, Soil & Water Conservation chuan keynote address a sawi a. Mission hian Governing Board a nei ang a, thuneitu sang ber a ni ang. A hnuaiah Steering Committee a awm leh ang a, anni kaihhruaina hnuaiah hian Nodal Department Land Resources, Soil & Water Conservation chuan district tina DC te nena thawhhovin hna an thawk dawn a ni. Fund hi NEC, NABARD, EAP, Ministry of Minority Affairs, CSR te leh a remchang apiang an dap ang. Kum tin hectare 1000 zel target siamin chhungkaw 1000 zel an tuam ang a, kum 2025-26 financial year atanga bul tanin kum li chhung atan an kalpui phawt ang. An hmalakna chu zau (cluster) ang zela kalpui tur a ni.

Mizoram hian rubber chin theihna ram hectares sing thum sangsarih aia zau hret a nei a, hectare sangruk za sarih velah chin tawh niin, chin tawh zawng zawng hmun thuma thena hmun khat vel an hnai theih tawh a, kum tin Metric ton 1460 vel thar chhuah mek a ni. Tuna Mizorama rubber ngah ber chu Er. CL Thangliana a ni a, kung singli chuang nei mekin thla khatah nuaih sawmhnih pakhat (Rs 21 lakh) vel a la lut mek nia sawi a ni.

CM's Rubber Missions hawnnaah hian Pu Lalfamkima, Dy. Speaker, Prof Lalnilawma, Horticulture Minister, Pu TBC Lalvenchhunga, Adviser to CM, Dr. Kenneth Chawngliana, Vice Chairman, Planning Board leh official pawimawh engemawzat an tel a ni.

Inkhawm hi Pu Vanlalmuanpuia Chhangte, Director, LR, S & WR chuan lawmthu sawiin inkhawm a khar a ni.