Tukin zing khan Chief Minister Pu Lal Thanhawla leh Indian Institute of Mass Communication (IIMC) Director General Pu K.G. Suresh te chuan CM Bangla ah inkawmna hun a nei.

IIMC DG Pu K.G. Suresh chuan Mizoram University Campus chhunga IIMC Northeast Campus sak mek hna chu za zelah 46 zawhfel tawh ani tih sawiin ram pek chungchangah Mizoram University inphalna leh Chief Minister hmalakna leh tawiawmna chungah lawmthu a sawi a. IIMC Northeast Campus hi nakum October thlaa peihfel hman anih hunah an hnathawh peng pakhat atana helai hmunah hian Asia Chhim Chhak-a chanchinbu mite tan training centre buatsaih an tum chu Ministry lamin a thuphungin rem an ti tawh tih a sawi a. IIMC Northeast Campus ah hian Certificate Course in Mizo Journalism tan ngaihtuah mek a nih thu a sawi bawk.

Eng Sawrkar tan pawh chanchin puanzarna leh public relations a pawimawh thu sawilangin Pu Suresh hian Mizoram Sawrkar hnuaia thawk I&PR officer-te tan tunlai thiamna mil a zirtirna leh training an buatsaih theih thu sawiin IIMC lamah hetiang training-a intir turin a ngen a, Chief Minister in an rawtna chu tha tiin ruahmanna siam turin Department hotute a hrilh tur thu a sawi a. DG chuan hetianga tih theih anih chuan IIMC leh Mizoram sawrkar inkara thawhhona kawng thar a inhawn a beisei thu a sawi bawk.

IIMC DG hi a thawhpui midang pathum leh Special Officer, IIMC Northeast Campus Pu L.R. Sailo ten an tawiawm a ni.