Nimin chawhma khan Sports & Youth Services Minister leh bialtu MLA ni bawk Pu Zodintluanga chuan Bunghmunah Indoor Stadium a hawng.

Pu Zodintluanga chuan kan ramah hmasawnna tam tak kan hmu chho mek a, Bunghmunah pawh hmasawnna thar duhawm hrang hrang kan hmu chho mek zel a ni, a ti a. Sawrkar chuan Bunghmunah talent a awm tih hria in, khawpui lian zawka Veng tam tak ten an neih ve loh infiamna hmunhma, mini-sport complex an nei chu an vanneih hle a ni, a ti. India ram mihring maktaduai tam tak awmnaa Bunghmun thalai ten medal an lak theih chuan, discipline dangah pawh medal an lak theih a beisei thu sawiin, taimakna leh tumruhna chiah in mamawh a ni, a ti a. Infiamna hmunhma an neih te chu uluk taka an enkawl leh an hman tangkai thiam chuan hmasawnna in a um zel dawn a ni, a ti bawk.

Pu C. Laltlanthanga, Secretary, Mizoram State Sports Council chuan technical report pe in, July ni 17, 2014-a hna thawh tan a nih thu a tarlang a. Cheng 44,18,640.00 building sakna atan leh cheng 3,48,820 electrification atan seng in, June ni 28, 2016 khan tha taka zawh fel a nih thu a sawi. Bunghmun Indoor Stadium len zawng hi a dung 65 ft., a vang 49 ft. leh a san zawng 31 ft. a ni a, Badminton Court pakhat bakah Changing Room leh inthiarna (toilet) te dah a ni.

He hawnna inkhawm hi Bunghmun VCP Pu B. Zoramthanga’n a kaihruai a, Bunghmun Games & Sports Association, Branch YMA leh Badminton Club President te atangin thusawi tawi ngaihthlak a ni bawk.