Nimin chawnhnu khan Thenhlum Indoor Stadium chu Sports & Youth Services Minister leh bialtu MLA ni bawk Pu Zodintluanga chuan a hawng.

Sports & Youth Minister chuan Thenhlum khawtlangin Indoor Stadium tha tak an nei chu lawmawm a tih thu a sawi a. Naupang leh thalai ten nun kawng diklo an zawh loh a, infiamna hmanga eizawnna ngelnghet an neih theihna turin khawtlang hruaitute chu an tuina kawnga kaihruai turin a chah a, India ram aiawha infiammi leh Mizoram ti hming tha tu Thenhlum atanga an la chhuah ngei a beisei thu a sawi a ni. Indoor Stadium hawn tak chu neitu rilru pua tha taka enkawl turin a chah bawk a ni.

Mizoram State Sports Council Secretary Pu C. Laltlanthanga chuan technical report a pe a. Kum 2013-14-a Special Plan Assistance (SPA) atangin Lunglei District chhunga Indoor Stadium pali (4) sak tur zingah Thenhlum Indoor Stadium chu telh ve a nih thu a sawi a. July ni 17, 2014-a thawh tan a ni a, cheng 44,18,649 building sakna atan leh cheng 3,48,840 electrification atan seng in, September ni 16, 2015 khan tha taka zawh fel a nih thu a tarlang. Thenhlum Indoor Stadium len zawng hi a dung 65 ft., a vang 49 ft. leh a san zawng 31 ft. a ni a, Badminton Court pakhat bakah Changing Room leh inthiarna (toilet) te dah a ni.

Thenhlum VCP Pu NG Lalrinawma’n he hawnna inkhawm hi a kaihruai a ni.