2428/2022-2023
Champhai, the 26th October, 2022: Govt. Vengthlang Middle School, Champhai kum 60 tlinna Diamond Jubilee (1962-2022) lawmna nimin chawhma dar 10:30 a neih chu Chief Minister Pu Zoramthanga, Headmaster hmasa ber ni bawk chuan khuallian ni a hmanpuiin Diamond Jubilee hriatrengna lungphun a hawng. He hunah hian Health & Family Welfare Board Vice Chairman Dr. Z.R Thiamsanga, Champhai North bialtu MLA chu khualzahawm niin Jubilee Souvenir a tlangzarh a ni.
Khuallian Chief Minister chuan Govt. Vengthlang Middle School in kum 60 hmel hmu theia a ding chu a lawmpui thu a sawi a. He school headmaster hmasa ber a nih dan leh a bulthut atanga din chhoh a nih dan te a sawi a. Tunah school changtlung tak ni theiin leh zirchhuak (alumni) hlawhtling leh langsar tak tak te an nei chu lawmawm a tih thu a sawi a. Tuna zirlai la ni mekte pawh hlawhtlinna an chan theuh a duhsak thu a sawi a. Chief Minister chuan tumruhna pawimawh zia sawiin, mi hlawhtling dangdai te hi mi naran, tumruhan nasa tak nei an nih mai thu an sawi thin chu rilru ah pai rengin, an zirlai ah theihtawp chhuah turin a chah a ni.
Khualzahawm Dr. ZR Thiamsanga chuan Govt. Vengthlang Middle School-in Diamond Jubilee lawmna hun hial a thleng thei chu a lawmpui thu a sawi bawk a. Mimal in luah hawha tlawm taka bultan chunga tun hun an thleng thei chu entawntlak tiin, zirlaite chu inthununna tha leh tum mumal tak neia theihtawp chhuah turin a chah a. Zirlai lo ni tawh thin mi hlawhtling tak tak Govt. Vengthlang Middle School-in a lo chherchhuah tawh thinte hniakhnung zuia hlawhtlinna chang thei tura lehkha zir turin a fuih a. Indaih lo chunga theihtawp chhuah thintu Zirtirtute leh thawktu dangte inpekna leh thahnemngaihna chu fakawm tiin, Sikul kalzelna turah duhsakna a hlan a ni.
Diamond Jubilee lawmna hun Sikul tualzawla hman hi Pu Lalvena Khiangte, Headmaster, Govt. Vengthlang M/S chuan a kaihruai a. Zirtirtu leh thawktu boral mi 30 te sunna hun hman a ni a. Pu C.Lalhrilliana, Teacher chuan School report a pe a. Managing Board Chairman, Headmaster leh Staff dang lo thawk tawh thinte chawimawi an ni a. Recitation, zai leh lam hmangtea hun hlimawm tak hmanho a ni bawk a. Pu Laltharinga, Teacher-in lawmthu sawiin hun a khar a ni.
Govt. Vengthlang Middle School din anih theih nan hian Sawrkar atangin School hawn phalna December ni 20, 1961 khan dawn niin, January ni 16, 1962 ah mimal in luah hawhin bultan a ni a. Headmaster hmasa ber leh Zirtirtu hmasa ber atan tuna Mizoram Chief Minister nihna chelh mektu Pu Zoramthanga chu ruat a ni a, phungbawm atan mi pathum dang ruat an ni bawk a. August ni 1, 1962 ah Aided School-ah hlankai a ni a, March ni 1, 1969 ah Deficit-ah hlankai niin, December ni 1, 1991 ah Provincialize a ni.
Kum 1989 ah Bharat Scouts and Guides kalpui tan niin nung taka chhawmnun zel a ni a. President's Scouts and Guides pass tawh Scouts 6 leh Guides 3 an awm tawh a. Heng bakah hian Zirlaiten District, State leh National Level inelnaahte telin lawmmante an lo la tawh thin bawk a. He Sikul atang hian khawtlang leh ram tana mi chhawrnahawm tak takte an lo chhuak nual tawh bawk a ni.
Govt. Vengthlang Middle School-ah hian tun dinhmunah Zirtirtu 16 leh Zirlai 141 an awm mek a. Vawiin thlengin Headmaster 9 an nei tawh a, Zirtirtu awm tawh zawng zawng zat chu 116 niin, fourth grade 7 leh Zirlai 5169 te an awm tawh bawk a ni.
Attachment
- Loading attachment...
