2429/2022-2023
Champhai, the 26th October, 2022: Champhai District Chess Association (CDCA) leh Mizoram Chess Association (MCA) tangkawp buatsaih, 22nd Mizoram Open Chess Championship 2022 chu vawiin chawhma dar 10 khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan Vanlallawma Indoor Stadium (VANIS), Champhai Kahrawt-ah a hawng a, tanpuina Rs 50,000/- a hlan nghal bawk. He hunah hian Dr. Lalhmuchhuaka, President, Mizoram Chess Association chu khualzahawm a ni.

Khuallian Health & Family Welfare Board Vice Chairman Dr. ZR Thiamsanga chuan Chess infiamna chu ngaihsanawm a tih thu sawiin, rilru, thluak leh ngaihtuahna sawrbing chunga khelh thin, rilru leh ngaihtuahna sawizawi nana tha tak a ni, a ti a. Infiamna buatsaih hautak lo leh sum sen ngai tam lo anih lehzelna chu remchang a tih thu sawiin, hunawl hman that nan leh ruihhlo leh thil dang, nun hruai khaw lo thei lak atanga fihlim thei tura puitu atana hman a pawimawh thu a sawi a. Chess infiamna chu khawvel ngaihsan rawn anih thu leh Mizote pawhin kan tih theih a nih thu sawiin, Mizoram mai nilo khawvel pum huap inelnaa langpha thei turin theihtawp chhuaha tan lak zel a tul thu a sawi a. Mizoram hmun hrang hrang atanga kalkhawmte lawmna thu sawiin, hun tha leh hlawkthlak tak hmang theuh turin duhsakna a hlan a ni.

Khualzahawm Mizoram Chess Association President Dr. Lalhmuchhuaka chuan kalkhawmte chu Chess tihhmasawn leh chawilar nana theihtawp chhuahpuiah a sawm a. Mizoramah Chess khel an pun zel thu leh District hrang hrangahte chawilar nan hmalak chhoh mek zel anih thu sawiin, heng zingah hian Chess in School (CIS) pawh kalpui tel a ni, a ti a. Chess khel thinte chu khelh mai duh tawk lova thiamna kawngah pawh hma sawn hret hret tum turin a fuih a. Chess chu rilru leh ngaihtuahna hmang chauh ni lo, taksa hriselna tha nena khelh ngai anih thu a sawi a. Chess khel thiam pungkhawmte chu nuam ti tak, dik leh felfai taka khel turin duhsakna a hlan a ni.

He hun hi Pu J. Lalmuankima, President, Champhai District Chess Association chuan a kaihruai a. Chief Arbiter Pu Lalthazama, Asst. Secretary, Mizoram Chess Association chuan technical report a pe a ni.

22nd Mizoram Open Chess Championship 2022 ah hian Chess khel thiam Mizoram hmun hrang hrang atangin All India Chess Federation (AICF) hnuaia inziaklut mi 45 vel an tel thei a. October ni 26 atanga ni 28 chhung hian round 7 (2-3-2) hmanga inelna hi neih tur a ni a. Tun tum hi Champhaiin Mizoram Open Chess Championship tum hnih a thlenna a ni.

Dr. ZR Thiamsanga hian District Sports & Youth Office, VANIS Champhai pawh tlawhin thawktute nen inkawmhona hun an hmang a; mamawh an neih leh hmalak tulte sawiho a ni.