Vawiin khan Chief Minister Pu Lal Thanhawla'n Mizoram Journalists' Association (MJA) inkhawmpui  General Conference vawi 44-na chu I & PR Auditorium ah a hmanpui a, Chief Minister hi MJA dintu Founder President a ni.

Chief Minister Pu Lal Thanhawla chuan tunlai khawvel thang chho zelah MJA leh chanchinbu pawh a than nasat thusawiin in mawhphurhna pawh a sang zel a, hei hi inhriat reng a pawimawh a, mipuite kaihhruaina leh zirtirna kawngah leh kan zavaia kan than choh zel nan theihtawp in chhuah zel a pawimawh a ni, a ti a. Chanchinbu mite mawhphurhna lian ber chu mipuite hnena thudik hriattir a ni a, he thilah hian Ram Danpui hnuaiah zalenna (Freedom of Press) kan nei zauin kan nei tha hle a, mahse chutih rualin kan mawhphurhna hi kan theihnghilh loh ka duh a ti a. Chanchinbu Editorial chungchang sawiin Editorial hi chanchinbu puitling leh changtlung tak lanna nia a hriat thusawiin editorial kaltlang hian mipui, Sawrkar leh Kohhran te hi ziritir leh kaihhruai theih kan ni, a ti.

Chanchinbu tan thil dik (accuracy), mawhphurna (responsibility) leh mawh lak (accountability) pawimawh leh a tul dante sawiin hengte hian chanchinbu rinawmna (credibility) siamin an hnathawh that (professional efficiency) a lantir a, awn bik leh tan bik nei lova thu lai la thiam a thil ziah leh report hi thil pawimawh tak nia a hriat tih a sawi. Hmasawn zel turin tunlai thiamna sang cho zelah intuaihriam leh inzir zel a pawimawh tih sawiin hemi kawngah hian chanchinbu mite chu tan laa hmasawn zel turin a chah a. Tawng humhalha, vawn that a, a dik taka ziah leh hman dan inzirtir a pawimawh thu sawilangin Chief Minister chuan kan tawng hi a mawi a, kan hmansual leh kan hman diklo avangin kan tichhe mek em tih kan ngaihtuah a ngai a, tawng hi kan ngaihpawimawh loh chuan kan hnam leh khawtlang nun hian a tuar thei a tiin hemi kawngah hian chanchinbu kaltlanga mipui kaihruai leh zirtir hi a sawt hle turah a ngaih thu a sawi.

Chanchinbu leh chanchinbu mite hi Mizo mipui kaihruai thei zing a mi in ni a, kawng hrang hranga khawtlang nun siamthatna kawngah in pawimawh a, a tangkai ber in ni thei a, hei hi hriaa in pawimawhna hre thar leh turin ka chah duh che u a ni, a ti a. Faina, thianghlimna leh hriselna kawngah te, kut tling lova sum lak pawisak loh tumte laka inven leh fihlim a tul thu te, tun aia nasa leh zawka mipui zirtir tura chahin neitu nihna leh mawhphurna inchen kan neih vek tih te hi uar leh zawka mipui in hrilh leh zirtir a pawimawh a ni, a ti a. Press Enclave chungchangah Sawrkarin theihtawp chhuahin hma a lak mek thu a sawi bawk.

MJA Gen. Hqrs. President Pu Vanlalrema Vantawl chuan a Presidential Address ah journalism chu ram khalh ngilhna kawnga a pawimawh dante sawiin journalism hian mawhphurna a keng sang a, hei hi chanchibu mite kan intlansiak ber na tur a ni, a ti a. Thiamna thar neih leh hriatna tih pun chu chanchinbu mite tehfung pawimawh tak pakhat a ni tiin hemi kawngah hian rilru hawn a pawimawh a ni, a ti a. Pawl in Member te zahawmna a pe tih sawiin chutiang bawkin Member te hian pawl zahawmna kan keng tel a ni tih kan hriatnawn fo a tha a ni, a ti.

MJA General Conference vawi 44-na hi Pu Zonunsanga Khiangte, Vice President, MJA Gen. Hqrs. chuan a kaihhruai a, inhmelhriattirna leh palai lawmna hun chu Pu Zohmingmawia, Secretary i/c Publicity, MJA Gen. Hqrs. in a hmang a. Kum kaltaa MJA Member pali boralta te - Pu J. Lalthangliana, Editor-in-Chief, Mizo Arsi; Pu P.C. Zonunsanga, Editor, Thenzawl Today; Pu K. Lalthlamuana, Editor, Ramnuam leh Pu Lalhlupuia, Editor, Mamit Times sunna hun leh Memorial Plaque hlanna chu Pu Lalremsiama, Secretary i/c Welfare in a buaipui a. Pu C. Lalhmachhuana, General Secretary, MJA Gen. Hqrs. in General Report ah kum 2016-17 chhunga MJA hmalakna te tarlangin Mizoram Journalists' Welfare Society sum cheng nuai 10 atanga nuai 20 ah Sawrkar in a tihpun sak avangin lawmthu a sawi a. Pu R. Lalhmangaihzuala, Treasurer, MJA, Gen. Hqrs. in Finance Report sawiin pawl sum leh pai dinhmun a tarlang a. State Investment Programme Management and Implementation Unit (SIPMIU) Deputy Programme Director Pu Netra Lal Jaisi chuan SIPMIU hmelhriattirna, hnathawh leh hmalakna te sawiin hun a hmang a ni. Lawmthu sawiin programme thawhkhatna hi Pu Lal Rinmawia, Secretary i/c Organization, MJA Gen. Hqrs. in a khar a. Chawhnu lamah Rorel Inkhawm neiin hun hman a ni.

MJA General Conference hi I &PR Secretary Pu Lalbiaktluanga, IAS leh I&PR Director Pi Lalnithangi leh a thawhpui officer ten an hmanpui a. MJA member palai 130 vel bakah Prominent Journalists pahnih - India rama working journalist upa ber Pu Lalbiakthanga Pachuau leh Pu S. Lalhmachhuana te pawhin vawiin Conference hi an hmanpui bawk a ni.

MJA Member hi mi 182 an mek a, hmeichhe member 7 an awm a, hengte zinga mi 128 chu Accredited Journalists a ni a.  District 8 ah District MJA an awm kim vek bakah MJA Hnahthial an awm bawk a. Kum 2016-17 chhung khan Mizoram Journalists’ Welfare Society hnuaia hamthatna hrang hrang chu mi 44 in an dawng a ni.