Health Minister Pu Lal Thanzara’n vawiin khan a pisa-ah Tata Trust aiawhte kawmin Mizorama cancer veite enkawl kawnga an thawhho theih dan tur a sawipui.
Mizoramah cancer a hluar tak em avangin cancer veite enkawl kawngah nasa lehzuala tan lak a ngai tih hriain sawrkar chuan Tata Trust-te nena thawhho dan kawng a zawng a. Tata Trust aiawh lokal te chuan Mizorama doctor leh nurse-te chu Mumbai leh Kolkata-a Tata Hospital-ah training an pek theih thu te, information & communication technology lamah an tanpui theih thu leh cancer veite enkawlna hmanrua leh hmunhma thuamthat kawnga an tanpui theih thu an sawi a ni.
Tata Trust aiawhte hian vawiin chawhnu khan Zemabawka Mizoram State Cancer Institute an tlawh nghal a. Naktukah Health Department hotute nen thawhho dan tur chungchang ngaihtuahin meeting an nei leh dawn a ni.
Vawiin meeting-ah hian Mizoram State Cancer Institute Director Dr. Zoramthanga leh Medical Oncologist Dr. Jeremy L.Pautu te bakah Tata Trust atangin Dr. Mrinalini Pandit, Ms.Aawanti Singh leh Globally Managed Services (GMS) atangin Pu Prabudha Barua te an tel a ni.
