Vawiin khan Mizoram Chief Secretary PuLalmalsawma hovin CS Conference Hall ah PMU Governing Body meeting pawimawh tak neih a ni a. Kum 2008 atanga India ram pumpuia Computer-a ram zawng zawng chhinchhiahna tur National Land Records Modernisation Program (NLRMP) chu Mizorama Land Revenue & Settlement Department in a kalpui tan mek chungchangah hmalakna tur pawimawh hrang hrang an rel a ni.

Mizoramah chuan he ram chhinchhiah runpui hi kum 2011-12 atang khan District paruk tuam tura hna tan ve niin Lunglei District ah tan hmasak ber a ni a, Serchhip District ah chhunzawm leh in heng District pahnihte hi zawh a ni tawh a, Aizawl leh Champhai District ah te hmalak mek niin Kolasib leh Mamit District te chu hmabak an ni.

Mizorama mite ram neihdan “Land Record” leh Property Registration te hi ‘digitised’ vek tura ruahman niin, a duh apiangin ‘online’-a en theih in a la awm dawn a ni.

He thil hi India Prime Minister Narendra Modi chuan a ngai pawimawh hle a, tun kum 2016-17 atangin Digital India hnuaiah dahin Digital India Land Record Modernisation Program (DILRMP) tia thlakin Central Sorkarin 100% -a a sponsor tur a ni a. He hna hi tha taka zawhfel a nih thuai theih nan Committee hian chak taka hmalak an tum a ni.