No.3742/2020-2021

Vawiin khan Mizoram Chief Secretary Pu Lalnunmawia Chuaungo chuan Mizoram chhunga bank hrang hrang hotute leh Mizoram Industry Owners Association (MIOA) hruaitute a pisaah kawmin Sawrkar Laipui Ministry of Micro, Small and Medium Enterprises (MSME) hnuaia industry neitute intunnunna tur Prime Minister’s Economic Package chungchang a sawipui.

COVID19 hripui leng avangin India ram chhung hmun hrang hranga industry neituten an tuar hle tih hriain Sawkar Laipui chuan suma harsatna tawk mek industry-te khaichhuahna turin ruahmanna Prime Minister’s Economic Package a siam a. He package hnuaiah hian MSME hnuaia loan account nei mekten dahkham ngai lo (collateral free) loan an la thei a. He loan latute tan hian kum khat chhung rulh let a ngai lo a, kum khat ral hnuah thla 36 (kum 4) chhungin thlatin installment inang khatin an rul thei dawn a ni. Industry loan hi a tlangpui thuin 10.5% atanga 13% a sanga rulh a ngai thin a, he special package hnuaiah erawh chuan 7.5% atanga 8.5% a sangin a rulh theih dawn a ni.

Sawrkar laipuiin he loan thar a duan hi vawikhata pektlak nghal ngai emaw ti mi engemawzat an awm avangin vawiin meeting-ah hian inhrilhfiah a ni a. COVID19 avanga inkhuahkhirhna (lockdown) kalpuiin nasa taka a nghawng industry neituten bul an tan that leh theih nan he loan hi duan a ni a, mamawhtuten an hman tangkai thuai a duhsak thu Chief Secretary Pu Lalnunmawia Chuaungo chuan a sawi a ni.