No.3741/2020-2021

Mizoram chhungah COVID19 case tunhnaiah a pung chak hle a, a bikin sipaiho zingah nasa taka hripui a darh avangin nimin khan Health Minister hovin thutkhawm hmanhmawh neih a ni a. He meeting thuchhuak bawhzui hian vawiin chhun khan Mizoram Chief Secretary Pu Lalnunmawia Chuaungo chuan Indian Army leh Paramilitary Forces hotute Chief Secretary’s Conference Hall, MINECO ah ko khawmin hripui a darh zel loh nana hmalak dan tur a sawipui. He meeting thuchhuak ang chuan August ni 15, 2020 thleng hian sipai leh paramilitary forces mi leh sa reng reng Mizoram pawn atanga rawn luh khap a ni a. Mizoram dinhmun a zirin an lo luh theih hun tur ngaihtuah that leh a ni ang.

Chief Secretary Pu Lalnunmawia Chuaungo chuan sipai zingah COVID19 darh nasa lutuk chu a rang thei ang bera tihtawp a tul tak zet a, hmalakna pawimawh hmasa ber chu sipai ho zingah state leh state inkara zinveivah khap hi a ni, a ti a. Sipaite hi unit hrang hrang inbanleta, inthlak reng an nih avang leh chhuti (leave)-a kal leh haw lam insulpel reng an nih avangin inter-state movement a nasa hle a, tul tawpah lo chuan hei hi khap tlat turin a hriattir.

India rama state dangte ngaihtuahin Mizoram chu hripui leng lakah thui tak kan la inveng thei tih sawiin Chief Secretary chuan tuna case awm mek tam zawk hi pawn lam atanga rawn lut an ni a, state dangte aiin inkhuahkhirhna khauh zawk kalpui a nih avanga inveng rih hram hram thei kan ni, a ti a. Amaherawhchu, sipai zingah nasa taka he hri hi a darh mek avangin khuahkhirh vat a nih loh chuan civil mi, mipui mimir zingah a darh hun a awm ngei ngei dawn tih a lan reng avangin Mizoram sawrkarin inkhuahkhirhna SOP a duan khauh lehzuala kalpui turin sipai hotute Chief Secretary chuan a hriattir. Pu Lalnunmawia chuan mipui zingah sipai hlauhna a intuh nasa tawh a, chuvangin, langtlang taka COVID19 laka sipaiho inven dan leh an hmalak dante puanzar a tul, a ti a. Civil mi tangkhang sing chuang sawrkarin a lakluh zingah COVID19 hripai tlema zawng chauh hmuhchhuah an nih laia sipai ho zingah heti taka COVID-19 vei an tam hi an inenkawl danah fel lo leh dik lo a awm ngei tih a chiang a, khirh leh khauh leh zuala state sawrkar hriatpuia hmala turin a hrilh a. Anmahni awmna area huamchhunga Local leh Village Level Task Force te nen an hmalakna te inhrilhhre zung zunga hma an lakna te inhriatpui tlang turin a hrilh a ni.

Mizoram DGP Pu SBK Singh chuan BSF camp gate pui pawn lamah, an camp panna kawngpui tawp zelah Mizoram Police duty an indah dawn tih meeting-ah hian a sawi.

Sipai leh paramilitary forces hotuten an hmalak dan sawiin an mi leh sa reng reng, Mizorama lo kir hlim emaw, awm mekte pawh quarantine an nih dan leh gate pela chhuah khap tlat an nih dan an sawi a. Assam Rifles hian Zokhawsangah quarantine centre leh CCC an nei a, Mizoram sawrkar facility-te hman ngai lovin an camp-ah khirh taka quarantine an kalpui thu an sawi a. Medical thiamna bik mamawh, symptoms nei mekte tih loh COVID19 positive-te chu anmahni hmunah zel dah hran an nih thu an sawi. BSF hian hmun an neih that tawk loh avangin Mizoram sawrkar quarantine facility leh CCC te an hmang a. Aizawl khawpui chhunga inluah leh mahni in nei sipaite pawh March thla atang khan BSF hmunah awm khawmin an nupui fanaute tlawh tura chhuah pawh phalsak an ni lo, tih an sawi a. Chhuti-a kal mekte engemawzat an leave pawhsei sak a, Mizoram chhunga awm mek te chhuti-a kal an khap bawk niin an sawi.

May, 2020 atanga July, 2020 chhungin Mizoram Home Department chhinchhiah danin Assam Rifles 1023, BSF 648, NDRF 38, Aizawl Military Station 81, CRPF 130, BRO 204, an vaiin mi 2124 lirthei hmangin Mizoram chhungah an rawn lut a ni.

Mizoram sawrkar Health Department chuan sipai tan bika CCC leh quarantine centre hi dan an zawm ngei em tih an endik thin a. An hmunte hi a tha tawk ngei tih ziakin an certify sak bawk a ni.