2623/2022-2023

Sahmulphah thla ni 11, 2022: Vawiin khan Mizoram Chief Secretary Dr Renu Sharma, IAS chuan Lawngtlai tlawhin, Lawngtlaia Mizoram Sawrkar hnuaia Head of Office te nen DC Conference Hall-ah inkawm hona hun an hmang.

Chief Secretary Dr Renu Sharma chuan kum 2012-a GAD Secretary a nih lai leh kum 2016-a Home Department Principal Secretary a nih laiin Lawngtlai chu a tlawh tawh tih sawiin, tun ṭum hi Lawngtlai a tlawh ṭum thumna a nih thu a sawi a. Lawngtlai District-in kawng hrang hranga hmasawnna duhawm tak tak a neihte chu lawmawm a tih thu sawiin, officer kal khawmte chu an hna ṭheuhvah theih tawp chhuah zel turin a fuih a. Department hrang hrangin District hmasawn nana an hna thawh chungchangah harsatna an neih chuan DC hnena thlen ṭhin tura chahin, DC kal tlangin a ṭul ang zela hma lakpui tura a inhawn thu a sawi a ni.

He hunah hian Lawngtlai Bawrhsap Pu Amol Srivastava, IAS chuan Lawngtlai District dinhmun tlangpui leh District chhunga sawrkar hma lakna langsar zualte report a pe a. Hemi rual hian District chhunga sawrkar hma lakna hrang hrang chungchang sawi hona hun hman nghal a ni.

He inkawm honaah hian Lawngtlaia Head of Office te an kal ṭha hle a. Chief Secretary ho hian Head of Office te chuan Sawrkar Laipui leh State Sawrkar ruahmanna hnuaia hmalakna hrang hrangte sawi hovin, harsatna chin fel dan tur leh chak zawka hma lak dan tur te an sawi ho a ni.

Chief Secretary hian Lawngtlaiah zan riakin, naktuk khian Lawngtlaia Sawrkar hmalakna hnuaia hmunhma pawimawh hrang hrangte a tlawh kual dawn a ni.