2632/2022-2023
Sahmulphah thla ni 12, 2022: Vawiin khan Mizoram Chief Secretary Dr Renu Sharma, IAS chuan Mizoram Sawrkar leh Sawrkar Laipui hmalakna hnuaia Lawngtlaia hmunhma pawimawh hrang hrang a tlawh.

Chief Secretary hi Lawngtlai Bawrhsap Pu Amol Srivastava, IAS, Home Department-a OSD-cum-Joint Secretary Pu David H. Lalthangliana, MPS leh official dangte'n an ṭawiawm a. Chief Secretary hian District Hospital Lawngtlai tlawh hmasa berin, District Medical Superintendent Dr Beiparysa K. hovin thawktute'n an lo dawngsawng a. Damdawi in lo fanpuiin, damdawi in dinhmun tlangpui an lo hrilh a. Harsatna leh hma lakna tur hmachhawp an neihte chu Chief Secretary hnenah hian lo thlenin, Lawngtlai District-in hriselna lama hma a sawn theih nana hma lak dan tur hrang hrang an sawi ho a. An harsatna leh mamawhte chu Chief Secretary chuan a theih anga umzuipui a tum thu a sawi a ni.

Hemi hnu hian Chief Secretary chuan inchhungkhura hleilenna tawk hmeichhe baihvaite tluk luh lailawkna tur Sakhi - One Stop Centre (OSC), Lawngtlai Bazar Venga mi chu tlawhin, thawktute nen inkawm hona hun an hmang a. OSC chu a chhawr turte'n ṭangkai taka an chhawr theih nan thawktute chu nasa lehzuala ṭan la tura fuihin, hmeichhiate humhimna kawnga hma lakna chak zawk a awm theih nan kawng ngaihtuah a tum thu a sawi a. Lawngtlai College Venga OSC building thar sak mek chu a hmunah tlawhin, a enfiah bawk.

Chief Secretary chuan Lawngtlai-III-a Branch YLA te enkawl Lai Cultural Centre-cum-Auditorium (LCCA) chu tlawh lehin, a enkawltute nen infiamna kawnga Lawngtlai ṭhalaite hmasawnna tur leh hnam ziarang chawi lar nana ṭangkai taka hman chhunzawm dan tur an sawi ho va. LCCA tihchangtlunna tur hmachhawp awmte an sawi ho bawk.

Chief Secretary chuan Kaladan Multi Modal Transit Transport Project (KMMTTP) kawngpui sial mek chu AOC Veng aṭanga Lawngtlai-Diltlang-Parva Road nena a intawhna (junction) thleng zawhin, kawng enkawltu NHIDCL hotute leh contractor-te nen project dinhmun an sawi ho va. Hemi hnu hian Lawngtlai College Venga PMJVK aṭanga Residential Sports School sak mek chu tlawhin, hna kal mek a en a. College Veng Anganwadi Centre-I tlawh nghalin, thawktute, nu leh naupangte nen an inkawm a. Thawktute chu anganwadi centre tihchangtlunna tur leh naupangte'n enkawlna ṭha lehzual an dawn theihna tura thil pawimawhte a sawipui a ni.

Chief Secretary hian Chawnhua Eklavya Model Residential School leh Electric Venga Govt Fair Price Shop-II te chu a tlawh bawk a. He'ng a hmunhma tlawh hrang hranga hmasawnna tur leh hma lak ngaihna te chu chhinchhiahin, Bawrhsap leh thawktute nen a ṭul anga hma lak zui dan tur an sawi ho nghal zel a ni.

Lawngtlaia hmunhma hrang hrang a tlawh hnu hian Chief Secretary chuan Lunglei panin Lawngtlai hi a chhuahsan nghal a ni.

Attachment

  • Loading attachment...