Kolasib dated 12th November 2022: Vawiin khan Kolasib Stadium, Project vengah K.Lalrinliana MLA CUP 2022 Football Tournament kharna hun hman a ni a. Pu Laltlanmawia, President, KDFA in hun kaihhruaiin Pu K.Lalrinliana, Minister, FCS & CA, bialtu MLA ni bawk chuan khuallian niin a hmanpui a, Tumpui VC team leh New Diakkawn VC team ten final khelin 2-1 in Tumpui VC team ten hnehna an chang.

Minister Pu K.Lalrinliana chuan Kolasib Assembly Constituency chhunga Village Council hrang hrangten inpawhna tha leh thawhhona tha an neih zel theih nan MLA Cup 2022 Football Tournament chu hmang tangkai turin a chah a, Kolasib bial chhunga thalaiten infiamna kawng a eizawnnatlak a an thiamna an tihpunna hmanrua a hmang turin a fuih bawk a ni. Mizo thalai zingah hlawhtling tak a infiamna eizawn nana hmang engemaw zah an awm tawh thu Minister chuan sawiin Kolasib khaw chhunga khelmual changtlung tak tak awmte chu thalaiten an thiamna leh theihna tihpun nan hmang tangkai zel turin a chah.

K.Lalrinliana MLA Cup 2022 Football Tournament ah hian Kolasib Assembly Constituency chhunga Village Council atangin mipa team 16 leh hmeichhe team 8 an tel a. Mipa player 345 leh hmeichhe player 147 awmin match 45 a awm a, inkhel zing a upa ber hi Pi Vanlalduhi, kum 55, Saidan VC team ami a ni. Vawiin hian Kolasib district chhung atanga Match Commissioner training chhuak mi 5 leh Indian Womens' League a khel pha player 3 te hnen ah chawimawina hlanna hun hman a ni bawk.