4532/2025-2026

Dated Aizawl, the 18th February, 2026 : Vawiin chawhnu khan Chief Secretary Pu Khilli Ram Meena kaihhruaiin mipuite tan sawrkar dawr awlsamna tura sawrkar dan leh dun tihtlem kawnga sawrkar laipui hmalakna ‘Compliance Reduction and Deregulation Phase II’ chungchang sawihona thutkhawm chu Secretariat Conference Hall, MINECO-ah neih a ni a. He thutkhawmah hian Pu K.K. Pathak, Special Secretary, Cabinet Secretariat, Centre’s Task Force on Deregulation and Compliance Reduction-a Head ni bawk leh a team-te an tel a ni.

Chief Secretary Pu Khilli Ram Meena chuan he hunah hian thu sawiin, sawrkarin dan leh dun mipuite zawm tur a tihtlem chu mipuite tan sawrkar dawr a awlsam zawk nan leh ram hmasawnna atana thil pawimawh tak a nih thu a sawi a. Phase I-ah ngaihpawimawh bik Priority Area 23 zingah Mizoram sawrkar chuan 17 hlawhtling taka an zawh tawh thu a tarlang a ni.

Special Secretary Pu K.K. Pathak pawhin vawiin thutkhawmah hian thu sawiin, Phase I-a Mizoram sawrkar hnathawh chu fakawm a tih thu a sawi a. Phase I-a India state hrang hrangte hnathawh that dan indawtah Mizoram chu 12-na niin, Phase II-ah chuan hei aia titha lehzual turin sawrkar official kalkhawmte a fuih a ni.

Phase II-ah hian Priority Area 23 leh Optional Priority Area 5 thlan chhuah a ni a. Heng zingah hian insak phalna awlsam zawka pek te, sumdawng mite tana license neih ngai tihtlem te, kawlpetha rang zawka thlunzawm dan tur te, khualzinte tana thlenna tur nuam leh tlawm siam leh thil dangte telin, line department hotute nen sawihona tha tak neih a ni.

Vawiin thutkhawmah hian Department hrang hrang Secretary-te leh official thahnem tak an tel.