4533/2025-2026

Lunglei, 2026 Ramtuk thla ni 18: Vawiin khan Lunglei District Horticulture Officer (DHO) Pu Lalṭhakima hovin Horticulture-a thawktute chuan Lunglei District-a Zawlpui khua leh Kauchhuah khuaa Kau lui kama nul siamtute chu a hmunah tlawhin, an hma lakna an enpui.

Lunglei DHO Pu Lalṭhakima hi Horticulture-a thawktute bakah, Lunglei DIPRO Pu C. Lalhruaitluanga leh thawktute'n an ṭawiawm a. Zawlpui leh Kauchhuaha nul siamtute hian an nul lo fanpuiin, an hma lak dan leh thlai an thar dan te, harsatna leh mamawh an neih hrang hrangte an lo thlen a. Horticulture-a thawktute hian an dinhmun enpuiin, hlawk zawk leh ṭha zawka thlai chin leh enkawl dan tur chungchangah kaihhruaina leh thurawn te an pe a. Thlai chi, lei ṭha, damdawi, tui lak leh thlai enkawl dan chungchanga nul siamtute mamawh hrang hrang chu a theih anga ngaihtuahpui zel an tum thu an sawi.

Zawlpui khuaah hian Kau lui kamah nul siam chhungkaw 45 vel awmin, an nul hi ṭin 120 hmun vela zau a ni a. Kum 2004 vel aṭang khan nul hi siam ṭanin, tunah hian kum tin cheng nuai 150 vel bawr la lutin an inchhut a. An thlai chin tam ber chu zikhlum niin, bawkbawn, tomato, hmarcha, carrot, anṭam, bean, changkha, vaimim (mimthlum leh khawchhak vaimim) leh thlai dang dang an ching bawk a. An thlai thar hi a tam zawk chu hralh turin Lungleiah thawnin, Thenhlum, Phairuang, Lungsen, Bunghmun leh Chawngteah te pawh an hralh ṭhin bawk.

Kauchhuahah hian tun dinhmunah nul siam chhungkaw 12 awmin, an nul zau zawng hi ṭin 15 hmun vel a ni a. Zikhlum, bawkbawn, tomato, anṭam, bean leh thlai hrang hrang chingin, an khaw chhehvel leh Lunglei lamah te hralh turin an thawn chhuak ve ṭhin bawk.

Horticulture Department hian Mission for Integrated Development of Horticulture (MIDH) leh scheme hrang hrang kal tlangin nul siamtute hi thlai chi bakah, lei ṭha leh damdawi te pein, tui pekna (drip & sprinkler irrigation) leh tui dah khawlna zem (collapsible water tank & community water tank) te an siamsak a. Thlai chin leh enkawl chungchangah thiamna lama kaihhruaina (technical support) te nen an vil zui reng a ni.