4534/2025-2026

Lunglei, 2026 Ramtuk thla ni 18: February ni 19, 2026 (Ningani)-a Lunglei District Disaster Management Authority (DDMA) leh National Disaster Response Force (NDRF) ṭang kawpa Lungleia lirnghing avanga chhiatna thlen thulha chet lak dan tur en chhinna (Mock Exercise on Earthquake Disaster) buatsaih tura inpuahchahna thlir hovin vawiin khan Lunglei DDMA member-te leh Mock Exercise-a mawhphurhna neite chu Lunglei DC Conference Hall-ah an ṭhu khawm.

Lunglei DDMA Chief Executive Officer Pi Rochuangkimi Khenglawt chuan ṭhut khawm kaihruaiin, chhiatna chu a thlen hun sawi theih ni lo mah se, eng tik lai pawha thleng thei a nih avangin inralring renga awm a ṭul tih a sawi a. Chhiatna thlen thulha chet lak dan tur hriat theih nan leh inralrin nan sawrkar ruahmannain a khat tawkin mock drill buatsaih ṭhin a nih thu a sawi a. Mawhphurhna hrang hrang neite chu ṭha taka an mawhphurhna hlen chhuah tum turin a chah.

Lungleia Mock Exercise buatsaih turah hian Treasury Office kawt chu chhanchhuah hna thawhnaa hman tur khawl leh mihring innghahna hmunpui (Staging aarea) atan ruahman niin, Staging Area Manager-ah Sub-Divisional Officer (Sadar) Pi TT Beikhaizi chu ruat a ni a. Chhiatna thlenna hmun atan Lunglei Venglaia kawng chung lei (Flyover Bridge), Art & Culture building leh mimal building te chu ruahman niin, Incident Commander atan Sub-Deputy Commissioner Pi Lalhlimpuii Pachuau chu ruat a ni a. PWD Office Complex chu hliam tuarte leh chhiatna tawkte awm lailawkna (Relief Camp) atan ruahman niin, PWD Lunglei Road Division-I Sr Executive Engineer Er SR Lalramthanga chu Relief Camp In-charge-ah ruat a ni a. Civil Hospital Lunglei chu mitthi leh hliam tuarte sawngbawlna leh enkawlna atan ruahman a ni bawk.

Ruahman lawk dan chuan naktuk, February ni 19, 2026 (Ningani) zing dar 11:00-ah lirnghing hi thleng anga lemchan tur niin, lirnghing thlen hnu hian mipui hriattirna ralkhel dar tihrik a ni ang a. Lirnghing avanga chhiatna thleng a awm thu District Emergency Operation Centre (DEOC) kal tlanga thuneitute hriattir an nih hnuah Staging Area-ah mawhphurtu hrang hrangte koh khawm an ni ang a. Staging Area aṭang hian chhiatna thlenna hmunah Incident Commander tirh nghal niin, Incident Commander hian chhiatna thlen dan leh chhanchhuaktu leh chhawmdawlna hna thawktu tur mamawh a nih dan te Staging Area-ah thlenin, Staging Area aṭang hian chhanchhuah leh chhawmdawl hna thawk tur team hrang hrangte chu chhiatna thlenna hmunah tirh leh nghal an ni ang.

Incident Commander kaihhruaina hnuaiah NDRF, SDRF, QRT leh sipaite'n chhanchhuah hna thawkin, department hrang hranga thawktute'n venhimna, mipui khuahkhirna leh chhiat tawkte chhawmdawlna kawnga an chanpual leh mawhphurhna hrang hrang an thawk bawk ang a. A hmunah damdawi lama thawktu, medical team te'n hliam tuar leh nunna chante enfiahin, an kaihhruaina hnuaiah Relief Camp lama thawn ngaite leh Civil Hospital-a thawn ngaite Ambulance hmangin thawn chhuah an ni ang a. Relief Camp leh damdawi inah hian a ṭul danin enkawl leh sawngbawl zui an ni dawn a ni.

Lunglei DDMA chuan February ni 19, 2026 (Ningani) chawhma dar 11:00 leh chawhnu dar 1:00 inkar vela Lunglei khawpui chhunga mock exercise buatsaih tur avang hian mipuite chi-ai lo tura chahin, thuneitute'n ruahmanna an siamte thu awih taka zawm a, ṭha taka thuneitute thawhpui turin mipuite an ngen.