1919/2024-2025

Aizawl, 5.9.2024: Vawiin khan Chief Secretary Dr. Renu Sharma kaihhruaiin Mizoram puma Swachhata Hi Seva 2024 Campaign kalpui dan turah Online Meeting neih a ni. District tin bawrhsap te’n an awm hmun atangin meeting hi online-in an chhim a ni. Sorkar laipuia Ministry of Housing and Urban Affairs in Swachhata Hi Seva 2024 Campaign hman dan tur ruahmanna a siam angin September ni 14 atanga October ni 1, 2024 thleng kalpui tur a ni.

Chief Secretary Dr. Renu Sharma chuan District bawrhsap te chu Sorkar laipuiin tun tum Swachhata Hi Seva hmalakna atana kaihhruaina a rawn siam leh Steering Committee thurel leh bawhzui dan turte a sawifiah a. Kumin SHS campaign ah hian ‘Black Spot’ tih an phuah, Cleanliness Target Units (CTUs) - hnawmhnawk inchhekkhawm, khawtlangin rei tak a lo ngaihthah tawh, environment leh mipui hriselna atan pawha pawi thei tur awm angte zawnchhuaha thenfai chu hna pui ber tur pakhat a nih tur thu a sawi.

Vawiin online meeting-ah hian UD&PA Secretary Pu Lalmalsawma Pachuau chuan September ni 14, 2024 a State Level Launching Programme chu MYC Auditorium, MINECO ah neih a nih tur thu a sawi a. Er. F. Liantluanga, PHED Secretary chuan thingtlang (Rural area) huamchhunga SHS hmalakna kalpui dan tur sawifiahin, Dr. Andrew H. Vanlaldika, UD&PA Director chuan khawpui (urban area) huamchhung a hmalak dan tur a sawifiah bawk.

District Level a hmalakna tur zingah hian thenfai hnatlang bakah Health camp buatsaih te, quiz/essay competition te, college te nen thawk hova hmalak leh awareness programme hrang hrang kalpui te a tel a ni. Kumin Swachhata Hi Seva ah hian thupui chu Swabhav Swachhata, Sanskaar Swachhata tih niin, faina leh thianghlimna chu nunphung pangngai a neih tura inzirtir chu ngaihpawimawh a ni.