1918/2024-2025

Khawzawl, dated 5th September, 2024: Vawiin dar 1:00 pm khan Khawzawl Zaingen Branch YMA Hall-ah Teachers' Day, 2024 hman a ni a, Khawzawl Deputy Commissioner, Pu K. Vanlalthiana chu khuallian a ni a, State Award to Teachers lo dawng tawh Pu B. Lalzethanga, Darngawn Veng hnenah chawimawina a hlan bawk.

He hunah hian khuallian Pu K. Vanlalthiana chuan thu sawiin Zirtirtute Ni hun tha tak buatsaih a nih avangin lawmthu a sawi a, zirtirtute hi mi pawimawh leh ropui tak, sawrkar leh ram hmasawnna atana inpe reng an nih avangin zahna chibai a buk a. Ruihhlo do zela naupang hamthatna ngai pawimawh a mahni hmasawn tum zel turin zirtirtute a fuih a, an thawhrah a lo lana zirna lama hma kan sawn zel theih nan duhsakna sang ber a hlan bawk a ni. Education Minister, Dr. Vanlalthlana Teachers' Day thuchah District Education Office atangin Jacinta Ramngaihsangi chuan a chhiar chhuak bawk.

Pu Andrew Lalrintluanga, Sub - Educational Education Officer chu chairman niin Pi Ramengmawii Sailo, DPO Office chuan hun a kaihruai a, department hrang hrang hotute leh aiawhte leh school naupang leh zirtirtu thahnem tak an tel bawk a ni.