1917/2024-2025

Dated Serchhip, the 5^th September, 2024: Vawiin khan Serchhip DC Pu Paul L Khuma chuan Baktawng Chan In leitawlhna hmuna retaining wall siam tur chungchangah contractor te leh leimin avanga harsatna tawk chhungkua te a kawm.

National Highway 54 in a paltlang Baktawng Chan In hmun thenkhat chu tun furpui ruahsur nasa avang hian tum tam tak lei a tawlh tawh a. Leitawlh avang hian chhungkua engemaw zatin harsatna an tawk a, kawngpui thenfai hna thawh leh vil zui reng a ngai bawk a ni. Chhiatna nasa zawk a thlen loh nan lei tawlh leh lei min zel tur ven nan mimal ram hmun thenkhat la heka retaining wall siam a tul ta a. Hemi chungchanga hmalak dan tur hi vawiin meeting-ah hian sawiho a ni.

He leitawlh in a nghawng nasat zual chhungkaw 6 te chu vawiin meeting ah hian an tel a. Leitawlh nasa avangin an chenna in leh a chhehvel a khi nasa hle tawh a. Chuvangin a ranglama retaining wall siam a tul hle tih meeting ah hian tarlan a ni a. Amaherawhchu, mimal ram thui tak lak hek tel a ngaih dawn avangin, a kaihhnawih chhungkua zawng zawng te leh contractor te inlungrual tlanna tur inremna thuthlung ziah ni se, tiin an rel a ni.

Vawiin meeting ah hian contractor te chu a rang lama a hmunhma zir chiang nghal tur te, retaining wall an siam dan tur ruahmanna kimchang siama September ni 15 ral hmaa DC hnena report thehlut hman ngei tura hriattir an ni a. Report a luh veleh DC kaihhruaina hnuaiah inhmuhkhawmna neih leh tur niin inremna ziah a ni ang a. Hemi zawh veleh hian retaining wall siam hna hi contractor ten an thawk tan nghal dawn a ni.

Vawiin meeting-ah hian District Administration aiawh te, NHIDCL leh Shivalaya aiawh te, leimin tuartu chhungkua te, Baktawng VCP leh Baktawng YMA President te an tel a ni.