1916/2024-2025

Aizawl dated 5th September, 2024: Vawiin chawhnu khan Prof. Lalnilawma, Minister, Public Health Engineering Department chuan E-in-C Meeting Hall, PHED Office-ah PHED pipe atanga tui put vilna tur 'Water Leakage Reporting Software System' a tlangzarh a. Er. H. Liantluanga, Secretary, PHED chuan tlangzarhna hun hi kaihruaiin Er. Lalrothanga, E-in-C in Software hman dan sawi zauna hun a hmang a. Er. H. Duhkima, CE, Zone II, Er. Ngentluanga, CE, Headquarters, Consumer Union hruaitute leh thutharlakhawmtute he hunah hian telin, Er. Zodinthari, CE, Zone I chuan lawmthu sawina hun a hmang.

Prof. Lalnilawma, PHED Minister chuan mihring dam khawchhuah nana thil pawimawh berte zing ami, tui lakkhawm, hmantlak tura sawngbawl leh rualkhai taka semzai tura mawhphurtu, Public Health Engineering Department-ten, khawvel thiamna thar hmang tangkai a, hna sawt zawka an kalpuina tura 'Water Leakage Reporting Software System' tlangzarh theiha an buatsaih chu lawmawm a tih thu a sawi a. Sum tam tak seng a tui lakkhawl leh pek chhuahte a put ral mai mai lohna tura tui put vilna tur System tihlawhtling tur hian kan khawtlang, ram leh hnam hmangaihna leh neitu nihna thinlungpu chunga PHE-a thawktute leh khawtlang mipui kan tanrual a pawimawh thu a sawi. PHED Minister chuan thlipui leh ruahpui avangin mipui mamawh phuhru tura hnathawhnaah PHE department chuan harsatna hrang hrang an hmachhawn rualin theihtawp an chhuah thin thu a sawi a. Tui pump khawl tana tha lo khawpin tui a nut thin thu tarlangin vawiin pawh khan tui nut dan chu 169 NTU (Nephelometric Turbidity Unit) a nih thu a sawi. Prof. Lalnilawma chuan tui put vilna software chu hun engemaw chen Aizawl khawpuia endik a nih hnu ah, hman tangkai dan a zirin district dangah pawh hman chhoh a nih tur thu a sawi bawk a ni.

Er. Rothanga, E-in-C chuan 'Water Leakage Reporting Software System' hman dan tur sawi zauna hun a hmannaah PHE-a thawktute leh khawtlang mipuite tangruala he mobile application hi a nih dan tur taka hman a nih chuan tui put thawmthatna kawnga hun leh tha tam tak hman ralna tur a venpui theih thu a sawi a. Chu chuan sum tam tak sen ralna tur a ven theih bakah hmasawnna ruangam duan zelna kawngah hriatna pawimawh tak tak lakkhawmna tura hmanraw tangkai a nih tur thu a tarlang bawk a ni.

'Water Leakage Reporting Software System' hi PHED leh Buannel Geo Solution & Services buatsaih a ni a. Mobile phone hmangin Android Playstore leh Apple App Store atangin a thlawnin download theih a ni. He application hmang hian PHE a thawktute hnenah phone kaltlangin tui putna thlalak thehluh mai tur a ni a, rang takin thawktuten an bawhzui nghal dawn a ni. He application hmanga PHED thawktute hnena tui put report pe tha te hnenah lawmman siam tum a nih thu tarlan a ni.

PHED Minister hian Software a tlangzarh zawh hian PHE Department building a fangkual nghal a ni.

A hnuai a link hmang hian Water Leak Reporter Apps a download theih a ni.

https://play.google.com/store/apps/details?id=com.josh81191.WaterLeakReporter