1915/2024-2025

5th September, 2024 : Vawiin khan MIZORAM REMOTE SENSING APPLICATION CENTRE (MIRSAC) chuan mipuiten awlsam zawka an Office an dawr theih nan an Website thar leh Data Order Portal an tlangzarh.

Tlangzarhna hun hi Directorate of Science & Technology office, MINECO, Khatlaah neih niin, Pi Hmingthanpuii, Principal Scientist, MIRSAC-in a kaihruai a. Website tlangzarhtu Pu K. Lalrammuana, Principal Scientific Officer chuan thusawiin MIRSAC Website leh a chhunga Data Order Portal buatsaih a nih dan leh hman tangkai theih dan turte a tarlang a. Tuna MIRSAC hmalakna hi Website thar siam ngawr ngawr ni lovin, a mamawhtute tana space technology leh chumi atanga data siam chhuahte mahni in lum aṭanga awlsam tak leh ṭangkai taka hman theih tura chhawp chhuah hi a tum bulpui ber zawk a ni tih a tarlang bawk. He hmalakna hian Sawrkar laipui leh state sawrkar pawhin a ngaih pawimawh em em ‘Ease of doing Business’ policy hi a tawmpui a; he hmalakna hian convention method- mahni ngei office-a va kala data order ngai ṭhinte chu kawng tam takin a chhawk zangkhai dawn a ni a ti.

Data Order portal-ah hian scientific data (a bikin Remote Sensing leh GIS technology hmanga siam) te chu a mamawhtute tana order theih a ni dawn a. He portal hmang vek hian data order tawhsa chu a download theih bawk dawn a ni. Hemi tur hian a mamawhtute chuan User account siam tur a ni a, he an account aṭang hian an order-te process a nih dan leh download theih hun tur pawh hrilh hriat vek an ni ang.

Website leh Data Order Portal hi Software Company, ‘SIRUK’ te siam niin, Pu Zoramthara Fanai, Chief Operating Officer-in technical report a pe a, Website leh Data Portal hi a hmang duhtute tana awlsam leh tangkai zawk tura buatsaih a nih thu a sawi.

MIRSAC website leh Data Order Portal kaltlang hian mipuiten MIRSAC data pawimawh chi hrangte awlsam takin an order thei dawn tawh a; mipuiten ṭangkai taka hmang turin an sawm nghal bawk a ni. Hrechiang duh tan MIRSAC website mirsac.mizoram.gov.in leh Data Order Portal - data.mirsac.in ahte luh tur a ni.